६ जेठ, जकपुरधाम। करिब दुई महिनाअघि धनुषाको गणेशमान चारनाथ नगरपालिकाले पालिकाभित्र सञ्चालन भइरहेका क्रसर र बालुवा प्रशोधन उद्योगहरूको अनुगमन सुरु गरेको थियो। गणेशमान चारनाथ नगरपालिका–७ पोर्ताहा भित्र रहेको कमलामाई क्रसर उद्योग र वडा नं ८ मा रहेको कमलेश्वरी बालुवा प्रशोधन उद्योगमा अनुगमन पछि ती क्रसर सञ्चालकहरूले कर्मचारीहरूलाई ज्यान मार्ने धम्की दिई भयावह वातावरण सिर्जना गरे। ‘अनुगमन सुरु गरेको बेला मात्र दुई ठाउँमा अनुगमन गरेको भनेर हामीलाई हटाइदिने र ज्यान मारेसम्मको धम्की आएपछि टोलीका सबै सदस्य डराए र अनुगमन रोकिन पुग्यो,’ टोलीका एक कर्मचारीले जानकारी दिए।
गणेशमान चारनाथ नगरपालिकामा हाल १० वटा क्रसर र बालुवा प्रशोधन उद्योगहरू सक्रिय छन्। वडा नं ६ मा कमला स्टोन क्रसर, वडा नं ७ मा कमलामाई क्रसर, शिवा बालुवा प्रशोधन र देवकी बालुवा प्रशोधन उद्योग रहेका छन्। त्यस्तै, वडा नं ८ मा गौरव बालुवा क्रसिङ, लवकुश बालुवा प्रशोधन, संकट मोचन बालुवा प्रशोधन र कमलेश्वरी बालुवा प्रशोधन उद्योगहरू सञ्चालनमा छन्। वडा नं ९ मा समीर बालुवा प्रशोधन र से.जा. अली बालुवा गिटी प्रशोधन (वासिङ) उद्योग सञ्चालनमा रहेका छन्। अनुगमन रोकिएको केही समयपछि गत १४ चैतमा नदीजन्य तथा खानीजन्य पदार्थ उत्खनन, सङ्कलन र बिक्रीसम्बन्धी जिल्ला अनुगमन समितिले कमला नदी किनारमा अनुगमन गरी अवैध उत्खनन गरी राखिएका बेवारिसे नदीजन्य पदार्थको स्टक फेला पारेको थियो।
जिल्ला समन्वय समिति धनुषाका अध्यक्ष राजनन्दन मण्डल, प्रमुख जिल्ला अधिकारी प्रेमप्रसाद लुइँटेल र सुरक्षाकर्मीहरूको टोलीले उक्त स्टकलाई गणेशमान चारनाथ नगरपालिकाले छिट्टै जफत गरी लिलाम गर्ने निर्णय गरेको थियो। चैतको तेस्रो सातामा उपप्रमुख तुल्साकुमारी पाण्डेको नेतृत्वमा पुन: अनुगमनमा जाँदा सो स्टक गाउँको स्थानबाट गायब भएको पाइएको थियो। शंका लागेर खोज्दा कमलामाई क्रसर र कमला स्टोन क्रसरमा उक्त स्टक फेला परेको थियो। अनुगमनमा सहभागी एक कर्मचारीले बताए अनुसार स्रोत खुलाउन नसकिएको कच्चा र प्रशोधित नदीजन्य पदार्थको नापजाँच गर्दा ३ लाख ३१ हजार ६१६ घनमिटर बालुवा, गिट्टी र ग्राभेल भेटिएको थियो। कमलामाई क्रसरमा १ लाख ५९ हजार ९६८ र कमला स्टोन क्रसरमा १ लाख ७१ हजार ६४८ घनमिटर पदार्थ फेला परेको थियो, जुन करिब ५० लाख रुपैयाँ बराबर छ।
कमला स्टोन क्रसर २०६२ कात्तिक १३ गते महादेव महतो सुडीको नाममा दर्ता भएको हो भने कमलामाई क्रसर २०६५ मंसिर २५ गते सञ्जय शर्माको नाममा दर्ता छ। कमलेश्वरी माई बालुवा प्रशोधन उद्योग २०७५ असोज ११ मा दर्ता भइसकेको छ। यी तीन उद्योग मात्र होइन, नगरपालिकामा रहेका सबै क्रसर र बालुवा प्रशोधन उद्योगहरूको नवीकरणमा असफलता छ। नदीजन्य पदार्थको स्टक गायब भएको विषयमा नगरपालिकाले प्रतिवेदन तयार गरेको छ, तर ती दुई क्रसर उद्योगलाई कारबाहीको दायरामा ल्याउन नगरपालिकामा साहस छैन। मेयर जीतनारायण यादवले स्टक गायब भएको विषयमा आफूलाई जानकारी नचाहेको बताएका छन् भने उपमेयर तुल्साकुमारी पाण्डेले यस विषयमा कुनै प्रतिक्रिया दिन चाहेनन्। प्रमुख प्रशासकीय अधिकृत टेकराज भट्टराईले आफु नयाँ नियुक्त भएकाले यस विषयमा जानकारी नभएको बताए, तर कर्मचारी स्रोतहरूका अनुसार प्रतिवेदन कार्यालयमा रहेको छ।
