सेयर बजार ३० अंकले वृद्धि, सबै सूचकहरूमा सुधार

सेयर बजार बुधबार ३०.०८ अंक (१.१० प्रतिशत)ले बढेर २७५४ अंकमा पुगेको छ। कारोबार रकम ३ अर्ब ८२ करोड पुगेको छ, जुन अघिल्लो दिनको भन्दा बढी हो। अपर लोहोरेखोला जलविद्युतको मूल्य १५ प्रतिशतले सबैभन्दा धेरै बढेको छ। ६ जेठ, काठमाडौं। अघिल्लो दिन ६ अंक घटेको सेयर बजार बुधबार ३० अंकले वृद्धि भएको छ। ३०.०८ अंक (१.१० प्रतिशत)ले बढेसँगै नेप्से परिसूचक २७५४ अंकमा कायम भएको छ, जुन अंक दिनभरको अधिकतम पनि हो। कारोबार रकम पनि बढेको छ। अघिल्लो दिन ३ अर्ब ८ करोडको कारोबार भएकोमा आज ३ अर्ब ८२ करोडको कारोबार भएको छ। आज कारोबार खुलेदेखि अन्तिम समयसम्म बजारको वृद्धि कायम रह्यो। २१ कम्पनीको मूल्य घट्यो भने २४८ कम्पनीको मूल्य बढ्यो। एउटा कम्पनी (एनएलजी)को मूल्य स्थिर रह्यो। सबै समूहका सूचकहरू बढेका छन्। दुई समूह सूचक हाइड्रोपावर र酒店 तथा पर्यटन सबैभन्दा बढी १.८९ प्रतिशतले बढेका छन्। बैंकिङ ०.७३, विकास बैंक ०.४४, फाइनान्स १.४०, लगानी १.१५, जीवन बीमा ०.९७, उत्पादन तथा प्रशोधन १.१५, माइक्रोफाइनान्स ०.६२, निर्जीवन बीमा ०.४४, अन्य १.०९ तथा व्यापार १.५१ प्रतिशतले बढेका छन्। अपर लोहोरेखोला जलविद्युतको मूल्य सबैभन्दा धेरै १५ प्रतिशतले बढेको छ। त्यस्तै माउन्टेन हाइड्रो नेपालको ११.८८, बुंगल हाइड्रोको ७.५१, शिखर पावरको ६.१२, सिटी होटलको ५.९० प्रतिशत मूल्य बढेको छ। कर्पोरेट डेभलपमेन्ट बैंकको मूल्य सबैभन्दा धेरै १३.२६ प्रतिशतले घटेको छ। बोटलर्स नेपाल बालाजुको ३, तथा कुथेली बुखरी हाइड्रोपावरको २.०७ प्रतिशतले मूल्य घटेको छ। आज धेरै कारोबार भएका पाँच कम्पनीमा कर्पोरेट डेभलपमेन्ट बैंक, आँखुखोला जलविद्युत्, अपी पावर, रिडी पावर र नेसनल हाइड्रोपावर रहेका छन्।