सूर्य नेपाल गल्फ टुर २०२५-२६ अन्तर्गत सातौं प्रतियोगिता सूर्य नेपाल च्यालेन्जको तेस्रो दिन भुवन नगरकोटी समग्रमा ११-अन्डर १ सय ९३ को स्कोरसहित शीर्ष स्थानमा रहेका छन्। आज उनले ३-अन्डर ६५ को उत्कृष्ट स्कोर बनाएका छन्, जसले उनलाई शुक्र बहादुर राईलाई ३ स्ट्रोकले पछि पार्न मद्दत गर्यो। शुक्र बहादुर राई समग्रमा ८-अन्डर १ सय ९६ को स्कोरसहित दोस्रो स्थानमा छन्। हिजो उनी भुवनसँगै संयुक्तरुपमा शीर्ष स्थानमा थिए।
समग्रमा ७-अन्डर १ सय ९७ को स्कोरसहित नेपालका नम्बर एक निरज तामाङ र धन बहादुर थापा संयुक्तरुपमा तेस्रो स्थानमा रहेका छन्। निरजले ६-अन्डर ६२ को उत्कृष्ट स्कोर निकालेका छन् भने धनले २-अन्डर ६६ मा तेस्रो दिनको खेल समापन गरे। प्रतियोगितामा ५२ खेलाडी सहभागी छन् र कुल पुरस्कार राशि ७ लाख १० हजार रहेको छ, जसमा विजेताले १ लाख ३० हजार प्राप्त गर्नेछन्।
समग्रमा ५-अन्डर १ सय ९९ सहित एमेच्योर राहुल विश्वकर्मा तथा प्रो गल्फरहरू रामे मगर र दिनेश प्रजापतिले संयुक्तरुपमा पाँचौं स्थान बाँडेका छन्। राहुलले ३-अन्डर ६५ मा उत्कृष्ट प्रदर्शन गरेका छन् भने रामे र दिनेशले समान २-अन्डर ६६ को कार्ड प्रस्तुत गरेका छन्। त्यस्तै, ६-अन्डर ६२ को उत्कृष्ट नतिजासहित टंक बहादुर कार्की समग्रमा ४-अन्डर २०० सहित आठौं स्थानमा पुगेका छन्।
सूर्य नेपाल प्रालिको प्रायोजनमा पीजीए नेपालद्वारा आयोजित ७२ होलको चार दिने प्रतियोगितामा कुल ५२ खेलाडी प्रतिस्पर्धा गरिरहेका छन्। प्रतियोगिताको कुल पुरस्कार राशि ७ लाख १० हजार रहेको छ। दोस्रो र तेस्रो हुने खेलाडीले क्रमशः ९० हजार र ७० हजार प्राप्त गर्नेछन्।
