७ जेठ, काठमाडौं । प्रमुख प्रतिपक्षी नेपाली कांग्रेस संसदीय दलका नेता भीष्मराज आङ्देम्बेले सभामुख डोलप्रसाद अर्यालको कार्यशैलीप्रति असन्तुष्टि व्यक्त गरेका छन्। संसद् बैठक सञ्चालनको क्रममा तटस्थता, निष्पक्षता र संसदीय मर्यादाको आधारभूत मान्यतामा क्षति पुगेको भन्दै सभामुख अर्यालको भूमिका खेदजनक रहेको आङ्देम्बेले बताएका छन्। उनले सभामुखका अभिव्यक्तिहरूप्रति पनि आपत्ति जनाएका छन्।
‘संसद् प्रतिपक्षको हुन्छ। सभामुख संसद्लाई व्यवस्थित गर्ने संवैधानिक निकाय हो,’ बिहीबार आफ्नो गृहजिल्ला पाँचथरमा आयोजित कार्यक्रममा आङ्देम्बेले भने, ‘तर आज प्रतिपक्षले आफ्ना धारणा राख्दा सभामुखबाट आएका अभिव्यक्तिहरू संसदीय र उचित नभएको महसुस गरिएको छ। ती अभिव्यक्तिहरू कर्णप्रिय पनि सुनिएका छैनन्।’ संसद्मा प्रतिपक्षले उठाएका मुद्दा सरकारसम्म पुर्याउन सभामुख असफल हुनुले सदनमा असन्तोष बढेको उनले टिप्पणी गरेका छन्।
‘अहिले सभामुखले संसद्मा उठेका विषय सरकारसम्म पुर्याउन सकेका छैनन्, जसको फलस्वरूप प्रतिपक्षी दलहरूमा असन्तुष्टि बढेको छ,’ उनले बताएका छन्। श्रम संस्कृति पार्टीले संसद्मा पम्प्लेट देखाएर विरोध गर्दा सभामुख अर्यालले संसदीय मर्यादामा रहने चेतावनी दिने विषयमा पनि आङ्देम्बेले आपत्ति जनाए। ‘हामीले अहिले प्लेकार्डद्वारा असन्तुष्टि जनाउँदा त्यसलाई अमर्यादित भन्नु गलत र झिनो रहन्छ,’ उनले भने।
हिजो प्रतिपक्षमा हुँदा तत्कालीन सांसद र अहिलेका सभामुख अर्याल पनि वेलमा पुगेर निलो स्कार्फ लगाएर आन्दोलन गरेको, वेलमा बसेर किताब पढेको तर त्यसलाई अवरोधको रुपमा प्रस्तुत गरेको स्मरण उनले गराए। ‘त्यतिबेला उचित ठानेको गतिविधि आज प्रतिपक्षले प्लेकार्डमार्फत आफ्नो असन्तुष्टि व्यक्त गर्दा किन अमर्यादित ठहरिन्छ?’ उनले प्रश्न गरे।
