९ जेठ, हुम्ला । जेठ ५ गते राति ११ बजे चंखेली गाउँपालिका–५ नेप्का गाउँमा ठूलो हावाहुरी सुरु भयो। त्यसपछि भारी वर्षा भयो। केही समयमै माथिबाट हिलोमाटोको बाढी खस्न थाल्यो। गाउँलेहरू कोही आत्तिए, कोही चिच्याए। सबैले अचानक आफूलाई असहाय महसुस गरे। ‘त्यो हावाहुरी र हिलो बाढीले ६० किलोवाटको लघु जलविद्युत् आयोजना पनि बन्द गरायो। अन्धकार रातमा सबै आत्तिए,’ चंखेली–५ का वडाध्यक्ष हर्कधन तामाङले सम्झिए, ‘सबैले बाहिर रहेका आफन्तलाई फोन गरेर आफ्नो जिउज्यानको जोखिमको खबर पुर्याइसकेका थिए।’ त्यो रात नेप्का गाउँ त्रासदीपूर्ण तरिकाले बित्यो।
‘मेरो भेडीगोठ बगायो, तर धन्यबाद छ भेडाबाख्रामा कुनै क्षति भएन,’ वडाध्यक्ष हर्कधनले भने, ‘तर धनसिंह तामाङको गोठ भत्किँदा ५३ भेडाबाख्रा पुरिँए।’ गाउँमा रहेको डाँफे आधारभूत विद्यालयमा ठूलो क्षति पुगेको छ। ढुंगा र माटोबाट बनेका दुई वटा भवनका चार कोठा भत्किएका छन्। विद्यालयका सात कम्प्युटर, दुई ल्यापटप र फर्निचरमा समेत क्षति भएको छ। गाउँको खानेपानी व्यवस्था गर्ने ५ हजार लिटर क्षमताको ट्यांकीमा समेत क्षति पुगेको छ। गाउँका ७५ घरहरू मध्ये ४५ घरको खेतीयोग्य जमिन र अन्नबाली लेदो माटोले पुरिँदा नष्ट भएका छन्, प्रहरीले जनाएको छ।
सात घण्टा पैदल यात्रा गरेर नेप्कामा प्रहरी टोली पुगेपछि प्रतिवेदनअनुसार, मेल्छाम प्रहरी चौकीले असई नन्दबहादुर शाहीको नेतृत्वमा चार सदस्यीय टोली परिचालन गरेको थियो। असई शाहीले भने कि आफ्नो टोली सात घण्टा पैदल हिँडेर नेप्का पुगेको हो। घटनापछि जिल्ला सदरमुकाम सिमकोटबाट प्रमुख जिल्ला अधिकारी टेककुमार रेग्मीको टोली हेलिकप्टरबाट निरीक्षणका लागि पुगेको थियो। उनीसँगै जिल्ला प्रहरी प्रमुख डीएसपी शंकर खड्का, सशस्त्र प्रहरीका डीएसपी पुष्करबहादुर सिंह र नेपाली सेनाका मेजर हरिबाबु श्रेष्ठ पनि उपस्थित थिए। तर, स्थानीयवासीहरूले प्रहरी र सीडीओ टोलीले कुनै राहत नदिई फर्किएको गुनासो गरेका छन्। चार दिन बितेपछि पनि बाढीपीडितहरूले सरकारबाट कुनै प्रकारको राहत नपाएको बताएका छन्।
