चीनले भारतलाई तिब्बती स्वतन्त्रता गतिविधिहरूका लागि कुनै प्लेटफर्म नदिन र दलाई लामाको पुनर्जन्म प्रक्रियामा हस्तक्षेप नगर्न आग्रह गरेको छ। केन्द्रीय तिब्बती प्रशासनले आगामी २७ मेमा नयाँ सिक्योङका रूपमा पेन्पा छिरिङको शपथ ग्रहण कार्यक्रम आयोजना गर्दैछ। चौधौँ दलाई लामाले आफ्नै नयाँ पुनर्जन्मको पहिचान गर्ने अधिकार ‘गादेन फोड्रङ ट्रस्ट’ लाई सुम्पिएका छन्।
चीनले भारतलाई ‘तिब्बती स्वतन्त्रता’ को पक्षमा गतिविधिहरूका लागि कुनै पनि प्लेटफर्म उपलब्ध नगराउन आग्रह गरेको छ। साथै, आगामी दलाई लामाको ‘पुनर्जन्म प्रक्रिया’ मा हस्तक्षेप नगर्न सोमबार भारतलाई चेतावनी दिएको छ। केन्द्रीय तिब्बती प्रशासनले आगामी मे २७ मा नयाँ सिक्योङको रूपमा पेन्पा छिरिङको शपथ ग्रहण समारोह आयोजना गर्दैछ।
भारतस्थित चिनियाँ दूतावासकी प्रवक्ता यु जिङले सामाजिक सञ्जाल ‘एक्स’ मा पोस्ट गर्दै चीनको धारणा सार्वजनिक गरेकी छन्। उनले केन्द्रीय तिब्बती प्रशासनलाई विश्वका कुनै पनि सार्वभौम देशले मान्यता नदिएको उल्लेख गरेकी छिन्। यु जिङले दलाई लामाको पुनर्जन्म धार्मिक र ऐतिहासिक परम्पराअनुसार हुँदै आएको र त्यसका लागि केन्द्रीय सरकारको स्वीकृति आवश्यक हुने दाबी गरिन्।
दलाई लामाले गत वर्ष आफ्नो ९०औं जन्मजयन्तीमा दलाई लामा संस्थाको निरन्तरता रहने घोषणा गरेका थिए। उनले नयाँ पुनर्जन्म खोजी प्रक्रियामा चीनको कुनै भूमिका नहुने पुनः दोहोर्याएका थिए। दलाई लामाको कार्यालयले यो प्रक्रियामा अरू कसैलाई हस्तक्षेप गर्ने अधिकार नभएको स्पष्ट पारेको थियो।
