समाचार सारांश समीक्षा सहित तयार गरिएको। लियोनेल मेस्सीले अर्जेन्टिनालाई सन् २०२२ को फिफा विश्वकप उपाधि जिताएका छन्। विश्वकपको इतिहासमा सबैभन्दा धेरै २६ खेल खेलेका मेस्सी, दुई संस्करणमा गोल्डेन बल जित्ने एकमात्र खेलाडी हुन्। प्रशिक्षक लियोनेल स्कालोनीको नेतृत्वमा अर्जेन्टिनी टोली मेस्सीसँगै २०२६ को विश्वकप उपाधि रक्षा गर्ने योजना बनाउँदैछ। ११ जेठ, काठमाडौं। फुटबल इतिहासका सबैभन्दा सफल र प्रभावशाली खेलाडीमध्ये एक हुन्, अर्जेन्टिनी स्ट्राइकर लियोनेल मेस्सी। उनी सानो ठाउँमा पनि विपक्षी खेलाडीलाई सजिलै छल्ने उत्कृष्ट ड्रिब्लरका रूपमा परिचित छन्। मेस्सी केवल गोल गर्ने मात्रै होइन, सबैभन्दा धेरै असिस्ट गर्ने खेलाडीमध्ये पनि अग्रस्थानमा छन्। उनले आठ पटक फिफाबाट सर्वश्रेष्ठ खेलाडीको पुरस्कार ‘द बेष्ट’ प्राप्त गरेका छन्।
स्पेनको एफसी बार्सिलोनामा १७ सिजन बिताउँदै उनले ३४ वटा उपाधि जिताउन सफल भएका थिए। त्यसपछि फ्रान्सेली क्लब पेरिस सेन्ट जर्मेनमा गएर लगातार दुई पटक लिग–१ को उपाधि जिताए। अमेरिकी क्लब इन्टर मियामीलाई इतिहासकै पहिलो एमएलएस कप उपाधि जिताएका मेस्सीले क्लब स्तरमा मात्र ४० ट्रफी जितेका छन्। उनले फिफा विश्वकप, पुरुष ओलम्पिक फुटबल प्रतियोगिता, युइएफए, कोपा अमेरिकासहितका धेरै प्रतियोगिताको उपाधि जितेका छन्। ३५ वर्षको उमेरमा उनले २०२२ मा कतारमा आयोजना भएको फिफा विश्वकप जिताएका थिए।
बाल्यकालमा मेस्सी ग्रोथ–हर्मोनको कमीबाट पीडित थिए। १३ वर्षको उमेरमा एफसी बार्सिलोनामा ट्रायल दिन पुगेका बेला उनको उचाइ ४ फिट ६ इन्च थियो। पूर्व डिफेन्डर जेरार्ड पिकेले सम्झँदै भनेका छन्, ‘उसले बल नछोउन्जेल हामीले उसलाई अस्वीकार गर्ने सोच बनाइसकेका थियौं। तर जब उसले बल चलायो, हाम्रो शंका समाप्त भयो।’ सुरूमा बार्सिलोनाका अधिकारीहरू मेस्सीलाई अनुबन्ध गर्न हिचकिचाएका थिए। शारीरिक अवस्था र उपचार खर्च धेरै थियो। तर क्लबका प्राविधिक निर्देशक चार्ली रेक्सचले एक कागजको न्यापकिनमै मेस्सीसँग सम्झौता गरेका थिए। यो फुटबल इतिहासकै चर्चित घटना मानिन्छ।
मेस्सी पाँच फरक विश्वकपमा असिस्ट दिने एकमात्र खेलाडी हुन्। त्यसैगरी, नकआउट चरणमा सबैभन्दा धेरै ६ असिस्ट गर्ने कीर्तिमान पेले र मेस्सीको संयुक्त छ। फिफा विश्वकप इतिहासमा सबैभन्दा धेरै खेल्ने खेलाडी पनि मेस्सी हुन्। उनले २६ खेल खेलेका छन्। २०२२ को विश्वकप फाइनलपछि मेस्सीले सबैभन्दा धेरै मिनेट खेल्ने रेकर्ड कायम गरे। उनले कुल २३१४ मिनेट खेलेर पाओलो माल्दिनीलाई पछि पारे। मेस्सीले विश्वकपमा कप्तानका रूपमा १९ खेल खेलेका छन् भन्ने रेकर्ड छ। मेस्सी एउटै विश्वकपमा समूह चरण देखि फाइनलसम्म हरेक चरणमा गोल गर्ने एकमात्र खेलाडी हुन्। उनले यो कीर्तिमान २०२२ को कतार विश्वकपमा हासिल गरेका थिए।
विश्वकप इतिहासमा सबैभन्दा धेरै गोल र असिस्टको संयुक्त संख्या २१ छ, जसमा पेले र मेस्सीको बराबरी छ। उनले विश्वकपमा ११ पटक प्लेयर अफ द म्याच पुरस्कार जितेका छन्। मेस्सी अर्जेन्टिनाका विश्वकप इतिहासकै सर्वाधिक गोलकर्तामध्ये एक हुन्, जसले १३ गोल गरेका छन्। मेस्सी दुई पटक विश्वकप गोल्डेन बल जित्ने एकमात्र खेलाडी पनि हुन्। मेस्सीको विश्वकप यात्रा मेस्सीले आफ्नो पहिलो विश्वकपमा पानी पसेरी स्मरणीय प्रदर्शन गराएका थिए। २००६ को विश्वकप अन्तर्गत सर्बिया र मोन्टेनेग्रोविरुद्ध वैकल्पिक खेलाडीको रूपमा १५ मिनेट खेल्दै उनले एक गोल र एक असिस्ट गरे।
तर क्वार्टरफाइनलमा जर्मनीविरुद्ध मेस्सीलाई बेन्चमै राखियो र अर्जेन्टिना पेनाल्टी सुटआउटमा पराजित भयो। २०१४ को विश्वकपमा मेस्सीले उत्कृष्ट ड्रिब्लिङ र सुन्दर गोलमार्फत विश्वलाई चकित पारे। उक्त संस्करणमा मेस्सीले गोल्डेन बल जिते तर अर्जेन्टिना फाइनलमा पराजित भयो। २०१८ को विश्वकपमा अन्तिम १६ मा बाहिरिएको अर्जेन्टिनाले २०२२ को विश्वकप उपाधि जित्यो। मेस्सीले टोलीलाई उपाधि जिताउन मात्र नभएर प्रतियोगिताभर ७ गोल गर्दै गोल्डेन बल हात पारे।
२०२६ विश्वकपमा अर्जेन्टिना र मेस्सीको सपना पछिल्ला ६२ वर्षमा कुनै पनि टोलीले लगातार दुई पटक विश्वकप जित्न सकेको छैन। अघिल्लो संस्करणको विजेता अर्जेन्टिना योपटक पनि उपाधि जित्दै ६२ वर्ष पुरानो परम्परा तोड्ने चाहना राख्छ। अर्जेन्टिनालाई २०२२ मा विश्वकप जिताउने लियोनेल स्कालोनीले यसपटक पनि टोलीको प्रशिक्षण गर्नेछन्। मेस्सीको ड्रिब्लिङ र गोल गर्ने क्षमताबाट विपक्षीलाई कठिनाइ पर्ने निश्चित छ। गोलपोस्टमा भरोसा एमिलियानो मार्टिनेज छन् भने रक्षामा क्रिस्टियन रोमेरोले मजबुत नेतृत्व गरिरहेका छन्। गत संस्करणमा युवा खेलाडी अवार्ड जितेका मिडफिल्डर एन्जो फर्नान्डेज प्रभावशाली खेलाडीका रूपमा विकसित भएका छन्। उनलाई रोड्रिगो डे पल र एलेक्सिस म्याक एलिस्टरले साथ दिइरहेका छन्। आक्रमणको अग्रपंक्तिमा जुलियन अल्भारेज र लाउतारो मार्टिनेज विश्वस्तरीय स्ट्राइकरका रूपमा अर्जेन्टिनाको मुख्य हतियार हुन्। नयाँ पुस्ताका उदाउँदै गरेका थियागो अल्माडा, निको पाज र फ्रान्को मास्तन्तुओनोले टोलीमा सिर्जनात्मकता र नयाँ ऊर्जा थपिरहेका छन्। यसैले अर्जेन्टिना फेरि विश्वकप जित्ने प्रमुख दाबेदार टोली मानिन्छ।
