सिन्धुलीका दीप थिङले बागमती प्रदेश स्तरीय ब्याडमिन्टन प्रतियोगिताको पहिलो संस्करणमा पुरुष एकल र यू–१५ तर्फका दुईवटा उपाधि जितेका छन्। बसुन्धरामा आयोजना गरिएको प्रतियोगितामा बागमती प्रदेशका १३ जिल्लाबाट १२० जना खेलाडी सहभागी भएका थिए। बीपी कोइराला स्मृति ट्रस्टका कार्यकारी निर्देशक राजेन्द्र पराजुली र महासचिव रामचन्द्र पोख्रेलले विजयी खेलाडीहरूलाई पुरस्कार वितरण गरे। ११ जेठ, काठमाडौं।
दीप थिङले ‘जननायक बीपी कोइराला बागमती प्रदेश स्तरीय ब्याडमिन्टन प्रतियोगिता–२०८३’ को पहिलो संस्करणमा पुरुष एकल र यू–१५ तर्फको उपाधि जितेका छन्। पुरुष एकलको फाइनलमा उनले काठमाडौँका सक्षम ढकाललाई पराजित गरे। बसुन्धरास्थित फिटनेश पार्क ब्याडमिन्टन एकेडेमीमा भएको प्रतियोगितामा ललितपुरका सशिन डंगोल र सुमन शाक्यले संयुक्त रूपमा तेस्रो स्थान हासिल गरे। यू–१५ तर्फको फाइनलमा दीपले ललितपुरका रिजन मगरलाई हराए। चन्द्रागिरीका बिप्लव खड्का र कीर्तिपुरका समानता भद्र बज्राचार्यले पनि तेस्रो स्थान प्राप्त गरे।
सिनियर (५० वर्षमाथि) डबल्सतर्फको उपाधि काठमाडौँका प्रेम घले र सुवाष श्रेष्ठको जोडीले जित्यो। यी जोडीले फाइनलमा काठमाडौँकै सांगे शेर्पा र सूर्य स्याङ्तानको जोडीलाई पराजित गरे। ललितपुरका श्याम गुरुङ र देवानसिंह राई तथा काठमाडौँका सुनिल बज्राचार्य र विकाश शाक्यको जोडीले संयुक्त रूपमा तेस्रो स्थान हात पारे। जूनियर यू–१३ गर्ल्स तर्फको उपाधि काठमाडौँकी अजारेन्का शेरचनले जितिन्। उनले फाइनलमा रामेछापकी अश्रुती कार्कीलाई हराएकी थिइन्।
पुरस्कार वितरण समारोहमा विजयी खेलाडीलाई बीपी कोइराला स्मृति ट्रस्टका कार्यकारी निर्देशक राजेन्द्र पराजुली र महासचिव रामचन्द्र पोख्रेलले पुरस्कार वितरण गरे। आयोजक संस्थाका निर्देशक पराजुलीले खेलकुद क्षेत्रको विकासका लागि विभिन्न गतिविधि संचालन गर्दै आएको बताएका छन् र आगामी दिनमा पनि प्रतियोगितालाई निरन्तरता दिने प्रतिबद्धता व्यक्त गरे।
सम्बन्धित खबर
