नेपाली टोली हङकङमा आयोजना हुने यू–२० एसियाली एथ्लेटिक्स च्याम्पियनसिपमा भाग लिन तयार

हङकङमा आयोजना हुने २२औं यू–२० एसियाली एथ्लेटिक्स च्याम्पियनसिपमा सहभागी हुन ५ खेलाडीसहित ८ सदस्यीय नेपाली टोली मंगलबार प्रस्थान गर्दैछ। मे २८ देखि ३१ सम्म चल्ने प्रतियोगितामा नेपालका ३ पुरुष र २ महिला खेलाडीले विभिन्न विधामा प्रतिस्पर्धा गर्नेछन्।

राष्ट्रिय खेलकुद परिषद्का सदस्य–सचिव रामचरित्र मेहताले सोमबार आयोजित एक समारोहमा नेपाली एथ्लेटिक्स टोलीलाई बिदाइ गर्दै सफलताको शुभकामना दिनुभयो। पुरुषतर्फ बादल कार्कीले १५०० र ३००० मिटर दौडमा र प्रवीण रानाले १०० मिटर दौडमा प्रतिस्पर्धा गर्नेछन्। महिलातर्फ अनुष्का अधिकारीले १०० र २०० मिटर दौड, नारायणी भण्डारीले ८०० र १५०० मिटर दौड र संगीता विकले ४०० तथा ८०० मिटर दौडमा भाग लिनेछन्।

टोलीको प्रशिक्षणका लागि रामबहादुर ओली, व्यवस्थापनका लागि गजबहादुर गुरुङ र दिलबहादुर बम नियुक्त भएका छन्।