१३ जेठ, काठमाडौं । मौसमविद्हरूले शुक्रबार देशका धेरै ठाउँमा वर्षा हुने सम्भावना व्यक्त गरेका छन्। वर्षा बिहीबार साँझदेखि नै सुरु भएर शुक्रबार राति तुलनात्मक रूपमा बढी हुने अनुमान गरिएको छ। जल तथा मौसम विज्ञान विभागको मौसम पूर्वानुमान महाशाखाका मौसमविद् रोजन लामिछानेका अनुसार शुक्रवार बिहान र दिउँसोभन्दा राति बढी वर्षा हुने सम्भावना छ। लामिछानेले भने, ‘शुक्रबार सातै प्रदेशमा वर्षा हुने सम्भावना देखिन्छ। हालसम्मको अवस्थाअनुसार हल्का देखि मध्यम खालको वर्षा हुने देखिन्छ।’
पश्चिम तराईमा अहिले तातो हावाको लहर चलेको छ, जहाँ पनि शुक्रबार वर्षा हुने भएकोले गर्मीबाट केही राहत पाउने विश्वास गरिएको छ। मौसमविद् लामिछानेका अनुसार नेपालमा हाल पश्चिमी वायु, स्थानीय हावा र पूर्वी भूभाग नजिकको न्यून चापीय क्षेत्रको प्रभाव छ, जसले बादल बढ्ने तथा मेघगर्जन र चट्याङ सहित वर्षा हुने पूर्वानुमान गरिएको हो। यसै कारण आज र भोलि केही जिल्लामा हावाहुरी चल्ने सम्भावना समेत छ।
केही मौसमविद्हरूले सुदूरपश्चिम, कर्णाली, लुम्बिनी र गण्डकीका केही स्थानमा भारी वर्षा हुने सम्भावना उल्लेख गरेका छन्। मौसमविद् विनोद पोखरेलले फेसबुकमा बिहीबार बेलुकादेखि शुक्रबारसम्म सुदूरपश्चिमदेखि बागमतीसम्म धेरै ठाउँमा भारी वर्षा हुन सक्ने बताएका छन्। अर्का मौसमविद् डा. धर्मराज उप्रेतीले पनि शुक्रबार कतिपय ठाउँमा भारी वर्षा हुने र बाढीको जोखिम हुन सक्ने सूचित गरेका छन्।
तर, जल तथा मौसम विज्ञान विभागको मौसम पूर्वानुमान महाशाखाले यो समाचार तयार पार्दासम्म भारी वर्षाको सम्भावनाबारे कुनै आधिकारिक जानकारी जारी गरेको छैन। महाशाखाका मौसमविद् लामिछानेले भने, ‘अहिलेसम्म हल्का देखि मध्यम वर्षा हुने सम्भावना छ। हामीले भारी वर्षा हुने भनेका छैनौं। यदि भारी वर्षा हुने सम्भावना देखा परेमा भोलि नै अपडेट गर्नेछौं। वर्षा छिटोछिटो परिवर्तन हुने भएकाले अहिले भारी वर्षा निश्चित भन्न सक्दैनौं।’ उनका अनुसार पश्चिम नेपालबाट सुरु भएको वर्षा प्रणाली क्रमशः पूर्वतर्फ सर्दै जाने र सातै प्रदेशका जिल्लाहरूमा हल्का देखि मध्यम वर्षा हुने सम्भावना छ। उनले यस प्रणालीलाई नजिकबाट अनुगमन गरिरहेका छन्। मौसम पूर्वानुमान महाशाखाका अनुसार आज पूर्वी र मध्य भूभागमा मेघगर्जन र हावाहुरी सहित वर्षाको सम्भावना रहेको छ, भने पश्चिम नेपालको तराई जिल्लामा तातो हावाको लहर कायम रहने देखिन्छ।
