अधिकारीहरूले भारतमा शरण लिइरहेका रोहिन्ज्या नेपाल भित्रिने आशङ्कामा सिमानामा सतर्कता अपनाइएको बताएका छन्। भारतीय सिमाना काटेर अन्य देशका नागरिकलाई गैरकानुनी रूपमा नेपाल प्रवेश गर्न नदिन “निगरानी र सक्रियता” बढाइएको अधिकारीहरूले जनाएका छन्। अहिलेसम्म अवैध रूपमा नेपाल प्रवेश गरेको कुनै घटना “रिपोर्टिङ” नभएको उनीहरूको भनाइ छ। विशेष गरी कोशी प्रदेशका सीमावर्ती जिल्लाहरूमा सतर्कता बढाइएको छ, जुन भारतको पश्चिम बंगालमा आएको राजनीतिक परिवर्तनसँग जोडिएको बताइएको छ।
बाङ्लादेशी र म्यानमारका रोहिन्ज्या शरणार्थीहरूका विरुद्ध कडा नीति लागू गरेको भारतीय जनता पार्टी (भाजपा) ले त्यहाँ सरकार गठन गरेपछि उनीहरू नेपाल भित्रिन नपाउने गरी विशेष निगरानी निर्देशन दिएको अधिकारीहरूले बताएका छन्। पूर्वी नेपालका सीमावर्ती जिल्लाहरूमा सुरक्षा चुनौतीलाई ध्यानमा राखेर सुरक्षा सक्रियता बढाइएको बताइएको छ।
भारतीय सञ्चार माध्यमहरूले भनेका छन् कि शनिबार टोलीका लागि गैरकानुनी आप्रवासीहरूलाई राख्न होल्डिङ सेन्टर बनाउन २३ जिल्लालाई निर्देशन दिइएको छ। मुख्यमन्त्री सुभेन्दु अधिकारीले अवैध प्रवेश गर्नेहरूलाई पहिचान गरी देश निकाला गर्ने “डिटेक्ट, डिलिट र डिपोर्ट” नीति घोषणा गरेको तीन दिनपछि गृह प्रशासनले कार्यान्वयनका लागि आदेश दिएको बताइएको छ।
नेपाल प्रहरीको कोशी प्रदेश प्रमुख रहेका नायब महा निरीक्षक (डीआइजी) विनोद घिमिरे भन्छन्, “गैरकानुनी प्रवेश रोक्न सीमा क्षेत्रमा निगरानी कडा गरिएको छ, त्यस्तै लुकीछिपी कति व्यक्ति प्रवेश गरेका छन् कि खोजी र पहिचानका लागि सुरक्षा परिचालन गरिएको छ।” तर उनले कुनै विशेष सूचना नभएर पनि सतर्कताको लागि यो नीति लागू गरिएको बताए।
सम्बन्धित खबर
