बहुराष्ट्रिय खाद्य कम्पनी नेस्ले इन्डियाले कार्यस्थलमा खुसी र मनोबल वृद्धिका लागि दुई गोल्डेन रिट्रिभर प्रजातिका कुकुरलाई ‘चिफ ह्याप्पीनेस अफिसर’ पदमा नियुक्त गरेको छ। कम्पनीका प्रबन्ध निर्देशक मनिस तिवारीले सामाजिक सञ्जालमार्फत यसबारे जानकारी दिएका छन्। तिवारीका अनुसार यी कुकुरहरूलाई कम्पनीको पाल्तु जनावर ब्रान्ड पुरिना र सहकार्यमा गरिएको अन्तर्वार्तापछि सो पदमा नियुक्त गरिएको हो। अब यी गोल्डेन रिट्रिभरले “तनाव कम गर्ने, कार्यस्थलमा उत्साह बढाउने र मुस्कान ल्याउन” सहयोग गर्ने बताइएको छ। उनीहरूलाई १६ वर्षभन्दा बढी अनुभव रहेको पनि उल्लेख गरिएको छ।
हाल नेस्ले इन्डियाको यो कदम र तिवारीको पोष्ट सामाजिक सञ्जालमा भाइरल बनेको छ। धेरैले यस कदमको प्रशंसा गरिरहेका छन्। जनावरहरूले तनाव कम गर्न र कार्यस्थलमा ऊर्जा थप्न भूमिका खेल्ने कुरा यथार्थ रहेको धेरैले बताएका छन्। नेस्ले इन्डिया स्विस बहुराष्ट्रिय कम्पनी नेस्लेको भारत शाखा हो र यसले म्यागी, नेस्क्याफे, किटक्याट लगायतका ब्रान्डहरू सञ्चालन गर्दछ। कम्पनीले चिफ ह्याप्पीनेस अफिसरको रूपमा नियुक्त गरेको गोल्डेन रिट्रिभर प्रजाति विश्वकै सबैभन्दा लोकप्रिय कुकुर प्रजातिहरूमध्ये एक मानिन्छ। यी कुकुरहरू अत्यन्तै मिलनसार र आफ्ना मालिकप्रति वफादार हुने गर्दछन्।
सम्बन्धित खबर
