समाचार सारांश नेपाली कम्युनिष्ट पार्टी (नेकपा) गठन भएदेखि सात महिना बितिसक्दा पनि केन्द्रीय कमिटी बाहेक अन्य संगठनात्मक संरचनाहरू समायोजन हुन सकेका छैनन्। २५ सय सदस्यीय विशाल केन्द्रीय कमिटीको बैठक बस्न नसक्दा पार्टीका निर्णयहरू ‘केन्द्रीय कार्य संयोजन’ समितिले गर्दै आएको छ। नेकपाले आगामी ११ देखि १५ मंसिरमा एकता महाधिवेशन गर्ने निर्णय गरे पनि जेठ मसान्तभित्र समायोजन टुंगिने सम्भावना कम देखिन्छ। १४ जेठ, काठमाडौं। पार्टी एकता भए सात महिनासम्म पनि नेपाली कम्युनिस्ट पार्टी(नेकपा)को संगठनात्मक संरचना एउटै बनाउन सकेको छैन। अहिलेसम्म एउटै संरचनामा रहेको भनेको केन्द्रीय कमिटी मात्र हो। गत १८ कात्तिकमा तत्कालीन माओवादी केन्द्र, एकीकृत समाजवादी, नेसपा लगायतबीच एकता भएर नेपाली कम्युनिस्ट पार्टी बनेको थियो। पुष्पकमल दाहाल ‘प्रचण्ड’ संयोजक र माधवकुमार नेपाल सह-संयोजक भएर सुरु भएको एकतामा दुई दर्जन पार्टी एवं समूह मिसिएका छन्। धेरै समूहबीचको एकता हुँदा केन्द्रीय कमिटीको आकार यस्तो भयो कि बैठक बस्नै नसकिने अवस्था आएको छ। २९ पुसमा केन्द्रीय सदस्यहरूलाई शपथ गराउन समेत भर्चुअल माध्यमको उपयोग गर्नु परेको थियो। केन्द्रीय मुख्यालय पेरिसडाँडाको खुल्ला चौरमा उभिएर अथवा भर्चुअल माध्यमबाट केन्द्रीय सदस्यहरूले शपथ लिएका थिए। त्यसबेला २३ सय जना केन्द्रीय सदस्य रहेको अनुमान थियो। अहिले त्यो संख्या बढाएर २५ सय पुर्याउने निर्णय नेताहरूले गरेका छन्। यति ठूलो आकारको केन्द्रीय कमिटी बस्न नसक्ने भएकाले पार्टी निर्णय लिन ‘केन्द्रीय कार्य संयोजन’ समिति बनाइएको छ। अहिलेसम्म नेकपाको औपचारिक निर्णय र गतिविधि यही संयोजन समितिबाट हुँदै आएको छ। ‘पार्टीको निर्णय लिन र बैठक बस्नसक्ने संरचना यही संयोजन समिति हो,’ एक शीर्ष नेता भन्छन्, ‘तर यसले पनि पार्टीलाई गति दिन सक्नेगरी निर्णय लिएको छैन। एकता प्रक्रिया अत्यन्तै ढिलो भइसकेको छ.’
