प्रदेश प्रमुख देवकोटा: गणतन्त्र सुदृढीकरणका लागि नागरिकको पहुँच र प्रतिफलको न्यायोचित वितरण आवश्यक छ

बागमती प्रदेश प्रमुख दीपकप्रसाद देवकोटाले नागरिकहरूको सहज पहुँच र राज्यबाट प्राप्त हुने प्रतिफलको न्यायोचित वितरणले गणतन्त्रलाई सुदृढ बनाउन सक्ने बताएका छन्। गणतन्त्र दिवसको अवसरमा बागमती प्रदेश गणतन्त्र मूलसमारोह समितिद्वारा आयोजित कार्यक्रममा उहाँले सङ्घीय लोकतान्त्रिक गणतन्त्रात्मक शासन व्यवस्थामार्फत मुलुकको राष्ट्रिय एकता, भौगोलिक अखण्डता र सार्वभौमिकतालाई अक्षुण्ण राख्दै दिगो शान्ति, सुशासन, विकास र समृद्धिको आकांक्षा पूरा गर्नु सबैको साझा दायित्व भएको उल्लेख गर्नुभयो।

उहाँले गणतन्त्र दिवसले सबैलाई आपसी सद्भाव, भ्रातृत्व र एकताको सूत्रमा बाँध्न थप ऊर्जा र प्रेरणा मिलोस् भन्ने कामना गर्दै गणतन्त्र स्थापनाका निमित्त आफ्नो अमूल्य जीवन उत्सर्ग गर्ने सम्पूर्ण सहिदप्रति श्रद्धाञ्जली अर्पण गर्नुभएको छ। सो अवसरमा नेपाल पत्रकार महासङ्घ ललितपुरका अध्यक्ष रामहरी कार्की, पत्रकार पोष्टराज अधिकारी, सुनिता विष्ट र युवराज श्रेष्ठलाई प्रति व्यक्ति ५० हजार रुपैयाँ नगदसहित ‘प्रदेश संस्थागत विकास पत्रकारिता’ पुरस्कार प्रदान गरिएको छ।