काठमाडौं । सिजी होल्डिङ्सअन्तर्गत सञ्चालित होटल र रिसोर्टहरू अब सिजी होटल्स एण्ड रिसोर्टको एउटै छतामुनि संचालन गरिने भएका छन्। बिहीबार ललितपुरमा आयोजित कार्यक्रममा कम्पनीका प्रबन्ध निर्देशक सूर्यान्श चौधरीले सिजी होल्डिङ्सका सबै होटल र रिसोर्टहरू आगामी दिनदेखि सिजी होटल्स एण्ड रिसोर्ट अन्तर्गत सञ्चालन हुने जानकारी दिए। चौधरीका अनुसार, हाल सिजी होटल्स एण्ड रिसोर्टमा ललितपुरको पुलचोकमा अवस्थित पाँचतारे क्राउन प्लाजा, द प्लाजा, चितवनको जगतपुरमा रहेको टाइगरल्याण्ड सफारी, नगरकोटको भंगेरी दरबार रिसोर्ट र काठमाडौंको मेराकी वेलनेस रिट्रिट समावेश छन्। साथै, आगामी दिनमा सञ्चालनमा आउने होटल तथा रिसोर्टहरू पनि यही छतामुनि रहनेछन्।
कम्पनीका अनुसार पुलचोकस्थित क्राउन प्लाजा यसै वर्ष २०८३ भित्र सञ्चालनमा आउँनेछ। यस होटलको व्यवस्थापन ग्लोबल कम्पनी इन्टरकन्टिनेन्टल हस्पिटालिटी ग्रुप (आईएचजी)ले गर्नेछ। करिब ६ वर्षपछि आईएचजी सिजी होल्डिङ मार्फत नेपालमा पुनः प्रवेश गर्न लागेको हो, जुन अहिलेसम्म सोल्टी होटेलको व्यवस्थापनबाट पछि हटेको थियो। २०७६ वैशाखमा शिलान्यास गरिएको यो होटल यसै वर्षदेखि सञ्चालनमा आउने तयारीमा छ।
सिजी होटल्स एण्ड रिसोर्ट अन्तर्गत अर्को प्रमुख रिसोर्ट नगरकोटको भंगेरी दरबार रिसोर्ट हो। आठ वर्षअघि निर्माण सुरु भएर गत वैशाखदेखि सञ्चालनमा आएको यो रिसोर्ट चन्द्र शमशेरले नगरकोटमा निर्माण गरेको भंगेरी दरबारको नाममा राखिएको हो। कम्पनीले सिजी होटल्स एण्ड रिसोर्टमा चितवनको जगतपुरमा रहेको टाइगरल्याण्ड सफारीलाई समेत समावेश गरेको छ। अन्तर्राष्ट्रिय चेन हस्पिटालिटी कम्पनी लेमन ट्रिस्कोको व्यवस्थापनमा सञ्चालनमा रहेको यो वन्यजन्तु रिसोर्ट चितवन राष्ट्रिय निकुञ्जको उत्तरी सीमामा अवस्थित छ। त्यस्तै, ललितपुरको पुलचोकमा रहेको नेपालको सबैभन्दा ठूलो मल्टिभेन्यु ‘द प्लाजा’ पनि सिजी होटल्स एण्ड रिसोर्टको छतामुनि सञ्चालनमा रहेको छ। यस्तै, काठमाडौंको बुढानिलकण्ठमा रहेको मेराकी वेलनेस रिट्रिट पनि सञ्चालनमा छ। यो रिसोर्ट काठमाडौं उपत्यकाको नजिकै भएकाले वेलनेसमा प्राथमिकता दिँदै जंगलभित्र आवासको अनुभूति प्रदान गर्ने तरिका अपनाएको छ।
