फ्रान्सले अत्यधिक मोटोपन भएका बिरामीहरूको लागि चिकित्सकको सिफारिसमा प्रयोग हुने औषधिको खर्च सरकारले व्यहोर्ने घोषणा गरेको छ। स्वास्थ्य मन्त्री स्टेफानी रिस्टले आगामी जुन महिनाको मध्यदेखि लागू गरिने गरी ६५ देखि १०० प्रतिशतसम्म औषधिको खर्च सरकारले व्यहोर्ने जानकारी दिइन्। यो सुविधा कम्तीमा ३५ बडी मास इन्डेक्स भएका र अन्य स्वास्थ्य समस्या भएका वा कम्तीमा ४० बीएमआई भएका बिरामीहरूले पाउनेछन्।
फ्रान्स युरोपेली संघका सदस्य राष्ट्रहरूमा यो सुविधा लागू गर्ने पहिलो देश बनेको छ। विश्वभर तीव्र रूपमा बढिरहेको मोटोपनको समस्यालाई समाधान गर्न नोभो नोर्डिस्क कम्पनीको ‘वेगोभी’ र एली लिली कम्पनीको ‘माउन्जारो’ जस्ता सुईमार्फत दिइने औषधिहरू प्रभावकारी मानिएका छन्। हाल फ्रान्समा यी औषधिहरूका लागि बिरामीहरूले मासिक औसत ३०० युरो खर्च गरिरहेका छन्।
स्वास्थ्य मन्त्री रिस्टका अनुसार, नयाँ प्याकेज पूर्ण रूपमा लागू हुँदा फ्रान्स सरकारले वार्षिक करिब १० करोड युरो बराबरको आर्थिक भार व्यहोर्ने अनुमान गरिएको छ। यो सुविधा कम्तीमा ३५ बडी मास इन्डेक्स भएको र मोटोपन सम्बन्धी अन्य कुनै रोग भएका बिरामीहरूले पाउनेछन्। फ्रान्समा लक्षित जनसंख्या करिब १० लाख भए तापनि चिकित्सकको विशेष सिफारिसमा मात्र यो सुविधा उपलब्ध हुनेछ।
सरकारले यी औषधिमा ६५ प्रतिशत खर्च व्यहोर्ने भए पनि मोटोपनका कारण अन्य स्वास्थ्य समस्या भोगिरहेका अधिकांश बिरामीहरूले शतप्रतिशत कभर प्राप्त गर्ने मन्त्री रिस्टले बताइन्। नोभो नोर्डिस्कका फ्रान्स प्रमुख एटिएन टिचिटले सरकारको यो कदमले जनस्वास्थ्यमा बढ्दो चुनौती र उचित उपचारको आवश्यकता सम्बोधन गरेको भन्दै स्वागत गरे।
