त्रिभुवन विश्वविद्यालय व्यवसाय इन्क्युबेसन केन्द्र र औद्योगिक व्यवसाय विकास प्रतिष्ठानको संयुक्त आयोजनामा कीर्तिपुरमा तीनदिने उद्यमशीलता विकास बुटक्याम्प सम्पन्न भएको छ। देशका विभिन्न क्षेत्रका करिब ३० जना नवउद्यमी सहभागी भएका यस कार्यक्रममा व्यावहारिक ज्ञान, सीप र मेन्टरिङमार्फत उद्यमशीलता प्रवर्द्धन गर्ने उद्देश्य राखिएको थियो। त्रिभुवन विश्वविद्यालयका निमित्त शिक्षाध्यक्ष प्रा. डा. शंकरप्रसाद खनालले विश्वविद्यालय शिक्षालाई उद्यमशीलता र नवप्रवर्तनसँग जोड्नु आजको आवश्यकता भएको बताए।
१५ जेठ, काठमाडौं। त्रिभुवन विश्वविद्यालय व्यवसाय इन्क्युबेसन केन्द्र र औद्योगिक व्यवसाय विकास प्रतिष्ठानको संयुक्त आयोजनामा उद्यमशीलता विकास बुटक्याम्प तथा व्यवसाय इन्क्युबेसन सेवा कार्यक्रम आयोजना गरिएको छ। जेठ १२ देखि १४ गतेसम्म त्रिभुवन विश्वविद्यालय, कीर्तिपुरमा रहेको इन्क्युबेसन केन्द्रको हलमा कार्यक्रम सफलतापूर्वक सम्पन्न भएको हो। देशका विभिन्न क्षेत्रबाट आएका करिब ३० जना नवउद्यमी तथा उद्यमशीलतामा रुचि राख्ने सहभागीहरूको उत्साहजनक उपस्थिति थियो।
कार्यक्रमको उद्घाटन गर्दै त्रिभुवन विश्वविद्यालयका निमित्त शिक्षाध्यक्ष प्रा. डा. शंकरप्रसाद खनालले विश्वविद्यालय शिक्षालाई उद्यमशीलता र नवप्रवर्तनसँग जोड्न आजको समयमै आवश्यक भएको बताए। उनले युवाहरूलाई मात्र रोजगार खोज्न नभइ रोजगार सिर्जना गर्न सक्षम बनाउने तर्फ यस प्रकारका कार्यक्रमहरूले प्रभावकारी भूमिका खेल्ने बताए। कार्यक्रममा औद्योगिक व्यवसाय विकास प्रतिष्ठानका कार्यवाहक निर्देशक मणिराम गौतमले त्रिभुवन विश्वविद्यालयसँगको सहकार्यले उद्यमशीलता प्रवर्द्धन र नवउद्यम विकासमा महत्वपूर्ण योगदान दिन्ने विश्वास व्यक्त गरे।
सहभागीहरूलाई व्यावहारिक ज्ञान, सीप तथा मेन्टरिङमार्फत सक्षम बनाउने उद्देश्यले कार्यक्रम सञ्चालन गरिएको जानकारी पनि दिइयो। त्रिवि व्यवसाय इन्क्युबेसन केन्द्रका निर्देशक प्रा. डा. ताराप्रसाद भुसालले केन्द्रको स्थापना, उद्देश्य र गतिविधिहरूको बारेमा जानकारी दिँदै विश्वविद्यालयमा नवप्रवर्तन, अनुसन्धान र उद्यमशीलताको संस्कार विकास गर्नु केन्द्रको प्रमुख लक्ष्य रहेको बताए। उनले भने, “कार्यक्रमले सहभागीहरूलाई आफ्ना व्यवसायिक अवधारणालाई व्यवहारिक व्यवसाय योजनामा परिणत गर्न सहजीकरण गरेको छ।”
उपनिर्देशक डा. प्रमोद पौडेलले उद्यमशीलता विकासका लागि आवश्यक ज्ञान, सीप र नेटवर्किङका अवसरहरू प्रदान गर्ने कार्यक्रम केन्द्रित भएको जानकारी दिए। सहभागीहरूले व्यवसाय योजना निर्माण, बजार विश्लेषण, वित्तीय व्यवस्थापन, व्यवसाय मोडेल विकास र प्रस्तुतीकरण सीपसम्बन्धी व्यावहारिक प्रशिक्षण प्राप्त गरेका छन्। तीन दिनसम्म सञ्चालन भएको कार्यक्रममा विभिन्न क्षेत्रका १२ जना अनुभवी प्रशिक्षक, विशेषज्ञ र मेन्टरहरूले उद्यमशीलतासँग सम्बन्धित बिभिन्न पक्षमा प्रशिक्षण र मार्गदर्शन दिएका थिए।
