सङ्खुवासभाको भोटखोला गाउँपालिका–४ सिरेकमा शुक्रबार सुख्खा पहिरो खस्दा खाँदबारी–किमाथाङ्का सडकखण्ड पूर्ण रूपमा अवरुद्ध भएको छ। पहिरोले करिब १५ मिटर सडक पुरिएकाले भोटखोला क्षेत्रका स्थानीयवासी र आवतजावत गर्ने यात्रुहरू मर्कामा परेका छन्। स्थानीय तह तथा सुरक्षा निकायको समन्वयमा आवश्यक उपकरण परिचालन गरी सडक खोल्ने प्रयास जारी रहेको जिल्ला प्रहरी कार्यालयले जनाएको छ।
शुक्रबार दिउँसो सडकमाथिको भिरालो भागबाट ठूलो परिमाणमा ढुङ्गा, माटो तथा गेग्रान खसेपछि उक्त सडकखण्डमा यातायात सेवा ठप्प भएको हो। पहिरो खसेसँगै उक्त मार्ग हुँदै आवतजावत गरिरहेका यात्रु तथा सवारीसाधन प्रभावित बनेका छन्। जिल्ला प्रहरी कार्यालयका प्रमुख प्रहरी नायब उपरीक्षक कुमारप्रमाद मैनालीले पहिरोको सूचना प्राप्त हुनासाथ प्रहरी टोली घटनास्थलमा परिचालन गरिएतापनि पहिरो खस्ने क्रम पूर्ण रूपमा रोकिएन र सडक खुलाउन नसकिएको बताए।
खाँदबारी–किमाथाङ्का सडकखण्ड जिल्लाको उत्तरी क्षेत्रलाई सदरमुकामसँग जोड्ने मुख्य सडक सञ्जाल हो। सडक अवरुद्ध हुँदा भोटखोला क्षेत्रका स्थानीयवासी, यात्रु तथा अत्यावश्यक सामग्री बोकेका मालवाहक सवारीसमेत प्रभावित भएका छन्। उत्तर–दक्षिण कोशी सडक योजनाका प्रमुख रामबहादुर गुरुङले पछिल्लो समयमा सडक आसपासका भिरालो क्षेत्रमा सुख्खा पहिरो खस्ने घटना बढेको बताए। कमजोर चट्टान र ढुङ्गा खस्ने जोखिम अझै रहेकाले यात्रा गर्दा विशेष सतर्कता अपनाउन उनले अनुरोध पनि गरे। योजना कार्यालय, स्थानीय तह र सुरक्षा निकायको समन्वयमा आवश्यक उपकरण परिचालन गरी पहिरो पन्छाउने तयारी भइरहेको छ।
