सरकारले आगामी आर्थिक वर्ष २०८३/८४ देखि बिजुलीमा मूल्य अभिवृद्धि कर (भ्याट) लागू गर्ने निर्णय गरेको छ। नयाँ व्यवस्थाअनुसार घरायसी उपभोक्तालाई ५ प्रतिशत र औद्योगिक तथा अन्य क्षेत्रका उपभोक्तालाई १३ प्रतिशत भ्याट लाग्नेछ। अर्थमन्त्री डा. स्वर्णिम वाग्लेले उपभोक्तालाई अतिरिक्त भार नपरोस् भनेर साउन १ गतेभित्र महसुल समायोजन गर्ने बताएका छन्। १८ जेठ, काठमाडौं।
सरकारले बिजुलीमा लगाएको मूल्य अभिवृद्धि कर (भ्याट) अनुसार घरायसी उपभोक्तालाई ५ प्रतिशत र सिँचाइ, खानेपानी, चार्जिङ लगायतका अन्य उपभोक्ताका लागि १३ प्रतिशत भ्याट लाग्ने भएको छ। अर्थमन्त्री डा. स्वर्णिम वाग्लेले आर्थिक विधेयक २०८३ मा ‘अन्तिम उपभोक्तालाई विद्युत् सेवा प्रदान गर्नेले कर लगाउने मूल्यमा ५ प्रतिशत दरले कर निर्धारण गरी असुल गर्नुपर्नेछ’ भनेका छन्।
नेपाल विद्युत् प्राधिकरणका निर्देशक शिव शर्माका अनुसार घरायसी ग्राहकलाई ५० युनिटसम्मको बिजुलीमा भ्याट नलाग्ने र त्यसपछि ५ प्रतिशत भ्याट लाग्ने व्यवस्था गरिएको छ। उनले भने, ‘प्राधिकरणले घरायसी ग्राहकलाई बिक्री गरेको बिजुलीमा ५ प्रतिशत भ्याट लाग्छ, भने उद्योग र अन्य सबै ग्राहकलाई १३ प्रतिशत भ्याट लाग्छ।’
आर्थिक विधेयकमा विद्युत् उत्पादन र बिक्री गर्ने व्यवसायलाई भ्याटबाट छुट दिएको छ। घरायसी प्रयोजनका लागि मासिक ५० युनिटसम्मको बिजुलीमा कर छुटको व्यवस्था गरिएको छ। अर्थमन्त्री वाग्लेले भने, ‘विद्युत् नियमन आयोगलाई अनुरोध गरेर मूल्य समायोजन गर्छौँ, प्रति युनिट ५० पैसा मात्र घटाइदिनु पनि राहत हुनेछ।’
