श्रम संस्कृति पार्टीका अध्यक्ष हर्कराज राईले प्रधानमन्त्री वालेन्द्र साहले संसदमा माफी माग्नुपर्ने बताएका छन्। उनका अनुसार, प्रधानमन्त्रीको अभिव्यक्तिले देशको भौगोलिक अखण्डता र सार्वभौम सत्तामा गम्भीर खतरा उत्पन्न गरेको छ। राईले प्रधानमन्त्रीले भारतलाई प्रभावित पार्ने उद्देश्यले यस्तो अभिव्यक्ति दिएको हुनसक्ने शंका पनि व्यक्त गरे।
१९ जेठ, काठमाडौं। प्रतिनिधि सभाको बैठकपछि सञ्चारकर्मीहरूसँग कुराकानी गर्दै राईले प्रधानमन्त्री साहको अभिव्यक्ति राष्ट्रहित विपरित रहेको भन्दै माफी माग्नुपर्ने आवश्यकतामा जोड दिए। उनले भने, “उहाँले जुन कुरा व्यक्त गर्नुभएको छ, त्यो पूर्ण रूपमा गलत छ, कार्यकारी प्रमुखले यसरी बोल्नु भनेको ठीक छैन।” राईले प्रधानमन्त्रीको अभिव्यक्तिले देशको सुरक्षामा गम्भीर चुनौती आएको दाबी गरे।
उनी थप्छन्, “त्यस्ता अभिव्यक्तिपछि विभिन्न स्थानमा भारतीय सैनिक हातहतियारसहित प्रवेश गरेको, र विभिन्न योजना अवरुद्ध भएको खबरहरू प्राप्त भइरहेका छन्।” राईले प्रधानमन्त्री साहको ‘नेपालले भारतको सीमा मिचेको रहेछ’ भन्ने अभिव्यक्तिले देशको भौगोलिक अखण्डता तथा सुरक्षामा ठूलो खतरा पुगेको उल्लेख गरे।
राईले प्रधानमन्त्रीको यस्तो चिप्लिनुलाई अचम्मको विषय ठान्दै भने, “प्रधानमन्त्रीजस्तो सम्मानित व्यक्तिले कसरी यस्तो गल्ती गर्नुभयो?” उनले १७ जेठको बैठकसम्बन्धी पनि प्रश्न उठाउँदै भने, “सायद रवि जी भारत जान लाग्नु भएकाले आकस्मिक बैठक बोलाउनुपर्ने अवस्था सिर्जना भयो कि?”
सम्बन्धित खबर
