भक्तपुरको सूर्यविनायक नगरपालिकाले ८ वर्षदेखि स्थानान्तरण स्वीकृति नदिई फ्युचर स्टार सेकेन्डरी स्कुल बन्द गर्ने सूचना जारी गरेको छ। नगरपालिकाले विद्यालय बन्द गर्ने निर्णय गरेपछि सञ्चालक रमेश सुवालले स्वीकृतिको माग गर्दै उच्च अदालत पाटन पुगेका छन्। हाल सो विद्यालयमा २१० जना विद्यार्थी अध्ययनरत रहेका छन् भने २७ जना शिक्षक र कर्मचारी कार्यरत छन्।
भक्तपुरको सूर्यविनायक नगरपालिका–८ मा पर्ने फ्युचर स्टार सेकेन्डरी स्कुल आठ वर्षदेखि स्थानीय तहबाट स्थानान्तरणको स्वीकृति नदिइ अनिश्चित अवस्थामा छ। विद्यालय सन् २०७२ सम्म भक्तपुर नगरपालिका–३ (पुरानो वडा नं. १६) मा संचालित थियो। विद्यालयका सञ्चालक रमेश सुवालका अनुसार भूकम्पपछि विद्यालय स्थानान्तरण आवश्यक भयो। उनले सूर्यविनायकका जनप्रतिनिधि र खापी स्थानीयसँग छलफल गरी निर्णय गरे।
२०७५ साल माघ १० गते उनले खापीमा विद्यालय स्थानान्तरणका लागि सूर्यविनायक नगरपालिकामा निवेदन दिएका थिए। तर २०७६ सालमा नयाँ संविधान लागु भएपछि स्थानीय तहको पहिलो चुनावका कारण प्रक्रिया अलमलमा परेको थियो। २०७८ सालमा सूर्यविनायक नगरपालिकाले भक्तपुर नगरपालिकाबाट सिफारिस माग्यो भने भक्तपुर नगरपालिकाले २०७९ साउन २ गते स्थानान्तरण विरोधको ३५ दिने सार्वजनिक सूचना जारी गर्यो।
अन्ततः २०८२ वैशाख ९ गते सूर्यविनायक नगरपालिकाले स्कुल बन्द गर्ने सूचना जारी गर्यो। सुवालले जनप्रतिनिधिसँग अनेक प्रयास गरे पनि स्वीकृति नपाएपछि अदालत जान बाध्य भएका छन्। उनले भने, “नगरपालिकाले रोक लगाएको निर्णय खारेज, उक्त पत्र खारेज र स्वीकृतिपत्र पाउने।” फ्युचर स्टार स्कुलमा हाल प्ले ग्रुपदेखि कक्षा १० सम्म विद्यार्थी अध्ययनरत छन्।
