इंग्लिस प्रिमियर लिग क्लब लिभरपुलले मुख्य प्रशिक्षकको लागि एन्डोनी इराओलासँग मौखिक सहमति गरेको छ। उनी दुई वर्षको सम्झौतामा हस्ताक्षर गर्न तयार छन् र यसको औपचारिक घोषणा यसै साता हुने अपेक्षा गरिएको छ। क्लबले गत शनिबार पूर्व प्रशिक्षक आर्ने स्लटलाई बर्खास्त गरेको थियो।
एन्डोनी इराओला बर्खास्त भएका आर्ने स्लटको स्थानमा लिभरपुलको नयाँ प्रशिक्षक बन्न नजिक पुगेका छन्। ४३ वर्षका स्पेनी प्रशिक्षक इराओला गत सिजनको अन्त्यमा प्रिमियर लिगकै क्लब एएफसी बर्नमाउथ छाडेर आएका हुन्। द एथलेटिकका अनुसार उनले दुई वर्षको सम्झौतामा हस्ताक्षर गर्न लागेका छन्।
इराओलाले आफ्नो प्रशिक्षक करियरमा छोटो अवधिका सम्झौताहरूमा काम गरेका छन्। उनले एईके लार्नाका, सीडी मिरानडेस, रायो भालेकानो र बर्नमाउथ पनि यस्तै प्रकारका सम्झौतामा काम गरेका थिए। इराओला आफ्ना सहायक प्रशिक्षक टमी एलफिक र शन कूपरलाई पनि एनफिल्ड लैजान इच्छुक छन्।
लिभरपुलले सकेसम्म छिटो नयाँ प्रशिक्षक नियुक्त गर्न चाहेको छ। क्लब आक्रामक र अग्रपंक्तिबाट दबाब सिर्जना गर्ने आफ्नो खेल शैलीमा मेल खाने प्रशिक्षक खोजिरहेको थियो। लिभरपुलका खेल निर्देशक रिचर्ड ह्युग्सले नियुक्ति प्रक्रियाको नेतृत्व गरिरहेका छन्। उनी पूर्वमा बर्नमाउथमा रहँदा इराओलासँग काम गरिसकेका हुन्।
