सामाजिक संस्थाहरूको माग : समाज कल्याण परिषद्को पुनर्संरचना र सामाजिक विकास बोर्ड स्थापना गर्नुपर्ने

२० जेठ, काठमाडौं । विभिन्न सामाजिक संस्थाहरूले समाज कल्याण परिषद्को पुनर्संरचना गरी सामाजिक विकास बोर्ड स्थापना गर्न माग उठाएका छन्। नेपालमा लोकतन्त्र स्थापना, मानव अधिकार संरक्षण, सामाजिक न्याय प्रवर्द्धन, सुशासन र समावेशी विकासका क्षेत्रमा सव भन्दा बढी ३० नागरिक तथा सामाजिक संघसंस्थाका महासङ्घ र सञ्जालहरूले नियमन निकाय, वैदेशिक सहायता र नागरिक एवं सामाजिक संघसंस्थाहरूको भूमिकालाई लिएर साझा धारणा सार्वजनिक गरेका छन्।
सरकारको शासकीय सुधार योजना, नीति तथा कार्यक्रम र बजेटमार्फत समाज कल्याण ऐनअनुसार स्थापना गरिएको समाज कल्याण परिषद्लाई खारेज गर्ने प्रस्तावप्रति ती संस्थाहरूले गम्भीर ध्यानाकर्षण गराएका छन्। उनीहरूले संघीय लोकतान्त्रिक व्यवस्थाको मर्मअनुसार स्वायत्त, स्वतन्त्र, समावेशी र अधिकार सम्पन्न ‘‘सामाजिक विकास बोर्ड’’ स्थापना गर्न सरकारसमक्ष आग्रह गरेका छन्।
‘कुनै पनि सार्वजनिक निकायको पुनर्संरचना वा खारेजीजस्ता दूरगामी निर्णय गर्दा पर्याप्त अध्ययन, अनुसन्धान, विकल्प विश्लेषण र सम्बन्धित सरोकारवालासँग व्यापक परामर्श र छलफल हुन जरूरी हुन्छ,’ महासङ्घ र सञ्जालहरूले संयुक्त अपिलमा उल्लेख गरेका छन्। साथै नागरिक तथा सामाजिक संघसंस्थाहरूको संवैधानिक स्वतन्त्रता, सहभागिता र विकास साझेदारीको भूमिकालाई सुरक्षित राख्दै स्वतन्त्र र अधिकार सम्पन्न सामाजिक विकास बोर्डमार्फत प्रभावकारी नियमन, समन्वय र सहकार्यको व्यवस्था आवश्यक रहेको उनीहरूले तर्क गरेका छन्।