२० जेठ, काठमाडौं । इरानले गरेको मिसाइल आक्रमणमा कुवेतको अन्तर्राष्ट्रिय विमानस्थलमा एकजनाको मृत्यु भएको दाबी गरिएको छ । मंगलबार, इरानले कुवेत र बहराइनलाई लक्षित गर्दै ड्रोन र मिसाइल आक्रमण गरेको विभिन्न अन्तर्राष्ट्रिय सञ्चारमाध्यमहरूले उल्लेख गरेका छन् । यस आक्रमणको क्रममा कुवेत अन्तर्राष्ट्रिय विमानस्थलको एउटा टर्मिनललाई ठूलो क्षति पुगेको छ । कुवेती अधिकारीहरूको जानकारी अनुसार उक्त हमलामा एकजनाको मृत्यु भएको र दर्जनौँ अन्य व्यक्ति घाइते भएका छन् ।
इरानी रिभोलुसनरी गार्ड कर्प्सले यस आक्रमणलाई अमेरिकाका लागि एउटा ‘पाठ’ भएको प्रतिक्रिया दिएको छ । अर्कोतर्फ, अमेरिकी सेन्ट्रल कमान्डले आत्मरक्षाका लागि इरानको क्यूस टापुमा जवाफी हमला गरेको र इरानका थुप्रै मिसाइल तथा ड्रोनहरूलाई निस्तेज बनाएको जनाएको छ । यसैबीच, अमेरिकी राष्ट्रपति डोनाल्ड ट्रम्पले इरानसँग युद्ध रोक्न जारी वार्ताका टोलीहरूबीच संवाद रोकिएको भन्ने रिपोर्टहरूलाई खण्डन गरेका छन् । उनले दुवै देशबीच निरन्तर संवाद भइरहेको दाबी गरेका छन् ।
