स्टारलिंककी निर्देशक रेबिका हन्टरले सञ्चारमन्त्री डा. विक्रम तिमिल्सिनासँग भेट गरी नेपालमा शतप्रतिशत स्वामित्वसहित इन्टरनेट सेवा सञ्चालन अनुमति दिन आग्रह गरेकी छिन्। सञ्चारमन्त्री तिमिल्सिनाले विद्यमान कानुनी व्यवस्था अनुसार प्रक्रिया पुर्याएर आए स्टारलिंकलाई नेपालमा सेवा सञ्चालन गर्न कुनै अवरोध नहुने स्पष्ट पार्नुभयो। नेपालको दूरसञ्चार नीतिमा विदेशी लगानी ८० प्रतिशतमात्र हुन सक्ने व्यवस्थाका कारण शतप्रतिशत स्वामित्व खोजेको स्टारलिंकको नेपाल प्रवेश रोकिएको छ। २० जेठ, काठमाडौं।
संसारकै सबैभन्दा धनी व्यक्ति इलन मस्कको कम्पनी स्टारलिंककी निर्देशक रेबिका हन्टर केही दिनयता नेपालमा छन्। नेपाल भ्रमणको क्रममा उनले सूचना तथा सञ्चारमन्त्री डा. विक्रम तिमिल्सिनासँग भेटवार्ता गरिन्। स्टारलिंक स्याटेलाइट प्रविधिमा आधारित अन्तर्राष्ट्रिय इन्टरनेट सेवा प्रदायक कम्पनी हो। यो कम्पनी स्पेसएक्स अन्तर्गत स्याटेलाइटमार्फत विश्वभर इन्टरनेट सेवा दिने लक्ष्यमा काम गरिरहेको छ।
सोमबार सञ्चारमन्त्री तिमिल्सिनासँग भेट गरेकी निर्देशक हन्टरले भेटका क्रममा स्टारलिंकले नेपालमा इन्टरनेट सेवा सञ्चालनको अनुमति लिन चाहेको बताइन। तर, केही नीतिगत र कानुनी जटिलताका कारण अनुमति पाउन नसकेको उनको गुनासो थियो। नेपालमा स्टारलिंकलाई प्रवेश दिन विद्यमान नीतिमा रहेको व्यवस्था संशोधन नभएसम्म सम्भव नरहेको तर्क निर्देशक हन्टरले व्यक्त गरिन्।
दूरसञ्चार नीतिमा त्यस्तो व्यवस्था भए पनि नीति आफैंमा बाध्यकारी हुँदैन। दूरसञ्चार ऐनमा विदेशी लगानी सम्बन्धी त्यस्तो कुनै व्यवस्थित प्रतिबन्ध छैन। यसबाहेक व्यावसायिक साझेदारी तथा सहकार्यका लागि नेपालका केही सेवा प्रदायकसँग छलफल भइरहेको जानकारी पनि उनले दिइन्।
