रमा तिवारी हत्या प्रकरणमा भिडियो सार्वजनिक भएपछि प्रहरीले सचेत गराउँदै जारी गर्यो विज्ञप्ति

२० जेठ, विराटनगर। झापाको दमककी २१ वर्षीया रमा तिवारी (रोमा)को हत्या प्रकरणमा विभिन्न व्यक्तिसँगको भिडियो अन्तरवार्ता कन्टेन्ट क्रिएटरले सार्वजनिक गरेपछि प्रहरीले भ्रामक तथा अपुष्ट सूचना नफैलाउन भन्दै विज्ञप्ति जारी गरि सचेत गराएको छ। जिल्ला प्रहरी कार्यालय झापाले अनुसन्धान भइरहेका हुँदा अनुमानमा आधारित सूचना सार्वजनिक गर्दा अनुसन्धान गम्भीर प्रभावित हुने बताएका छन्।

प्रहरीका अनुसार अनुसन्धानका संवेदनशील पक्षहरु आधिकारिक स्रोतबाट पुष्टि नहुँदा सार्वजनिक गर्नु न्याय प्रक्रिया प्रतिकूल प्रभाव पार्न सक्छ। गत जेठ १६ गते दमक–१० स्थित सेतुमारीको रतुवा खोलामा दमक–८ बसन्तटोलकी रमा तिवारीको शव बोरा भित्र राखेर रतुवा खोलामा फालेको अवस्थामा भेटिएको थियो। उनी घरबाट हराएको तीन दिनपछि मृत फेला परेकी थिइन्।

इलाका प्रहरी कार्यालय दमकका डिएसपी हरि बस्नेतले बताएअनुसार प्रहरीले सूक्ष्म अनुसन्धान अगाडि बढाइरहेको छ। शंकास्पद व्यक्तिहरूलाई सोधपुछ भइरहेको छ। मृतकको मोबाइल फोन कल डिटेल र शंकास्पद व्यक्तिहरुको गतिविधिमा केन्द्रित रहेर अनुसन्धान भइरहेको र निष्कर्ष नजिक पुगिएको पनि उनले जानकारी दिएका छन्।