सन् २०२६ को फिफा विश्वकपको मेक्सिकोमा हुने उद्घाटन समारोहमा संगीतकर्मी शाकिरा र बर्ना ब्वायले आधिकारिक गीत प्रस्तुत गर्ने भएका छन्। फिफाले तीनवटै आयोजक राष्ट्रहरू मेक्सिको, क्यानडा र अमेरिकामा विभिन्न कलाकारहरूको प्रस्तुति सहित छुट्टाछुट्टै उद्घाटन समारोह आयोजना गर्दैछ। विश्वकप फाइनलको हाफटाइम शोमा शाकिरा, माडोना र बीटीएसले प्रस्तुति दिने तय भएको छ।
सह-आयोजक मेक्सिकोको पहिलो खेलअघि शाकिरा र बर्ना ब्वायले विशेष प्रस्तुति दिनेछन्। मेक्सिको सिटीमा हुने उद्घाटन समारोहमा उनीहरूले प्रतियोगिताको आधिकारिक गीत ‘डाइ डाइ’ प्रस्तुत गर्ने कार्यक्रम छ। उक्त समारोह विश्वकपको उद्घाटन खेलमा आयोजक मेक्सिको र दक्षिण अफ्रिकाबीचको खेलअघि आयोजना गरिनेछ।
फिफाले तीनै आयोजक राष्ट्रमा छुट्टाछुट्टै उद्घाटन समारोह गर्ने योजना बनाएको छ। मेक्सिकोको कार्यक्रममा शाकिरा र बर्नासँगै अलेजान्द्रो फर्नान्डेज, बेलिन्दा, डानी ओसियन, जे बाल्भिन, लिला डाउन्स, लस एन्जलस अजुल्स, माना र टायला पनि सहभागी हुनेछन्। क्यानडाको उद्घाटन समारोह जून १२ मा टोरोन्टोमा हुनेछ, जहाँ अलान्सिस मोरिसेट र माइकल बबल मुख्य आकर्षण रहनेछन्।
त्यसै दिन अमेरिकाको लस एन्जलसमा हुने समारोहमा केटी पेरी, लिसा, रेमा, अनिता र फ्युचरले प्रस्तुति दिनेछन्। यी तीनवटै उद्घाटन समारोह इटालीका प्रसिद्ध निर्माता मार्को बालिचको निर्देशनमा तयार पारिएका हुन्। प्रत्येक समारोह खेल सुरु हुनुभन्दा करिब ९० मिनेटअघि आयोजना गरिनेछ। यसैबीच, विश्वकप फाइनलको हाफटाइम शोमा पनि शाकिरासँगै माडोना र बीटीएसले प्रस्तुति दिने तय भएको छ। विश्वकपको आधिकारिक गीत ‘डाइ डाइ’ मार्फत फिफाले शिक्षा क्षेत्रमा सहयोग पुर्याउने उद्देश्यसहित १० करोड अमेरिकी डलर संकलन गर्ने लक्ष्य राखेको पनि जनाएको छ।
सम्बन्धित खबर
