२२ जेठ, काठमाडौं । बेलायती राजा चार्ल्स तृतीयले नवगठित गोर्खा आर्टिलरी युनिटको प्रशंसा गरेका छन्। विल्टसायरको लार्कहिल ब्यारेकमा सैनिकहरूको परेडमा सहभागी हुँदै राजा चार्ल्सले गोर्खा सैनिकहरूको दृढता र प्रतिबद्धताको प्रशंसा गरेका हुन्। सो अवसरमा राजालाई २१ तोपको सलामीसहित स्वागत गरिएको थियो। समारोहलाई सम्बोधन गर्दै राजा चार्ल्सले भने, ‘यसले बेलायत र नेपालबीचको स्थायी र मूल्यवान सम्बन्धको गहिराई दर्शाउँछ।’ उनले परेडमा गोर्खा सैनिकहरूलाई देख्दा आफू निकै गर्वित महसुस गरेको पनि बताए। यो युनिट सन् २०२५ मा गठन गरिएको हो। त्यसै अवसरमा राजा चार्ल्सले यो युनिटको सुरुवातसँगै नयाँ अध्यायमा प्रवेश गरेको बताउँदै ब्रिटिश सेनाभित्र यसलाई पूर्ण क्षमताले विस्तार गर्न पनि अनुमति दिएको जानकारी दिए। आगामी तीन वर्षमा ४०० गोर्खा सैनिक उक्त युनिटमा समावेश हुनेछन् भनिएको छ।
