हङकङलाई डीएल प्रणाली अन्तर्गत १९ रनले पराजित गर्दै नेपाली राष्ट्रिय पुरुष क्रिकेट टोली एशियाली खेलकुद (एशियाड) छनोट प्रतियोगिताको च्याम्पियन बनेको छ। सिङ्गापुरमा सोमबार सम्पन्न प्रतिस्पर्धात्मक फाइनल खेलमा हङकङले दिएको १८९ रनको लक्ष्य पछ्याउँदै ११४ रन बनाएको अवस्थामा वर्षा भएपछि नेपाल विजेता घोषित भयो। त्यतिबेला नेपालले ११.३ ओभरमा २ विकेट गुमाएर ११४ रन बनाएको थियो। हङकङका अनुभवी ब्याट्समन अंशुमन रथले ८० रन बनाएर टोलीले ७ विकेट गुमाएर १८८ रनको चुनौतीपूर्ण स्कोर तयार पारेका थिए।
जवाफमा उत्कृष्ट फारममा रहेका ओपनर कुशल भुर्तेलले ४० बलमा ६५ रन बनाएर नेपालको जितको बाटो सहज बनाएका थिए। हङकङको चुनौतीको अगाडि टस जितेर नेपालले पहिले फिल्डिङ गर्ने निर्णय गरेको थियो। शेर मल्लले दोस्रो ओभरमा निजाकत खानलाई आउट गर्दै नेपाललाई राम्रो सुरुआत दिलाए भने तेस्रो ओभरमा करण केसीले अनुभवी बाबर हायतलाई शून्य रनमा पवेलियन फर्काएपछि नेपालले सुरुआतमा स्थितिलाई नियंत्रणमा लिएको थियो।
तर त्यसपछि लामो समयदेखि हङकङ टोलीमा रहेका अंशुमन रथले इनिङ्स बलियो तुल्याए। उनले ६५ बलमा ८० रन बनाए, जसमा ६ छक्का र ६ चौका समावेश थियो। उनले आक्रमक शैलीमा २८ बलमा ५५ रन बनाएका शाहीद वासिफको पनि योगदान थियो। बलिङतर्फ शेर मल्ल उत्कृष्ट भए। उनले कुल ४ विकेट लिए। अन्य बलरहरू महँगो साबित भए। सन्दीप लामिछानेले ४६ रन खर्चेर १ विकेट लिए भने करण केसीले ४५ रनमा २ विकेट लिए।
कुशलले सम्हालेको ब्याटिङ पछिल्ला दुई खेलमा लगातार शतकीय पारी खेल्दै कीर्तिमान राखेका ओपनर कुशल भुर्तेलले फाइनलमा पनि आफ्नो उत्कृष्ट प्रदर्शन जारी राखे। ओपनर सहयात्री आशिफ शेख पहिलो बलमा आउट भए तापनि कुशलले विपक्षी बलरमाथि निरन्तर आक्रमण गर्दै उत्कृष्ट प्रस्तुतिका साथ खेल अघि बढाए। कुशलले ४० बलमा ६५ रन बनाए, जसमा ८ चौका र ३ छक्का रहेका थिए। त्यस्तै रोहित पौडेलले ३५ रन बनाएका थिए भने कप्तान दीपेन्द्र सिंह ऐरी ९ रनमा अविजित रहे। जापानमा आगामी सेप्टेम्बरमा हुने २०औँ नागोया एशियाडमा नेपालसहित हङकङ, मलेशिया र ओमान छनोट भइसकेका छन्। सोमबार भएको तेस्रो स्थान खेलमा मलेशियाले ओमानलाई ८ विकेटले पराजित गर्यो। एशियाडमा पहिला सिधा छनोट हुने प्रचलन थियो, तर अहिले छनोट चरण पार गर्नुपर्ने नियम लागु गरिएको छ।
