प्रतिनिधि छनोट विवादका कारण स्थगित भएको रास्वपा उदयपुरको जिल्ला अधिवेशन नयाँ कार्यतालिका अनुसार फेरि सुरु भएको छ। उदयपुर जिल्ला सभापति पदका लागि चित्रकुमार कार्की र जनक बस्नेत चुनावी प्रतिस्पर्धामा छन्। मतदान अधिकारसम्बन्धी विवाद समाधान पश्चात प्रतिनिधि संख्या कटौती गरी २५० कायम गरी सोमबार साँझबाट मतदान सुरु गरिने तय भएको छ। २५ जेठ, उदयपुर।
प्रतिनिधि छनोट र मतदान अधिकारसम्बन्धी विवादका कारण स्थगित भएको रास्वपा उदयपुरको जिल्ला अधिवेशनमा निर्वाचन प्रक्रिया पुनः सुरु भएको छ। निर्वाचन कार्यतालिका रद्द भएपछि सोमबार नयाँ कार्यतालिकाअनुसार उम्मेदवारी दर्ता गरिएको छ। निर्वाचन समितिका संयोजक नारायण घिमिरेका अनुसार जिल्ला सभापति पदका लागि चित्रकुमार कार्की, जनक बस्नेत र ध्रुवप्रसाद पोखरेलले उम्मेदवारी दिएका थिए। तर पोखरेलले उम्मेदवारी फिर्ता लिएपछि सभापतिका लागि कार्की र बस्नेतबीच प्रतिस्पर्धा हुने भएको छ।
उपसभापति पदमा किरण राउत र कृष्णकुमारी घिमिरे श्रेष्ठ चुनावी मैदानमा छन् भने सचिव पदका लागि जनार्दनकुमार कार्की, भुवन खतिवडा र सूर्यबहादुर तामाङबीच प्रतिस्पर्धा हुने देखिएको छ। सहसचिव पदमा सूर्यकुमार राई र हुकुममणि पाण्डेले उम्मेदवारी दिएका छन्। यसअघि आइतबार उद्घाटन सत्र सम्पन्न भएपछि निर्वाचन प्रक्रिया अघि बढाउने तयारी भइरहेका बेला प्रतिनिधि छनोट र मतदान अधिकारको विषयमा विवाद उत्पन्न भएको थियो।
विवाद चर्किएपछि अधिवेशनस्थलमा नाराबाजीसमेत भएको थियो। केही प्रतिनिधिहरूले नेतृत्व चयन प्रक्रियामा हस्तक्षेप भएको आरोप लगाउँदै निष्पक्ष र पारदर्शी निर्वाचनको माग गरेका थिए। विवाद समाधानका लागि निर्वाचन समितिले आइतबारको सम्पूर्ण निर्वाचन कार्यतालिका रद्द गर्दै पुनः उम्मेदवारी मनोनयनबाट प्रक्रिया सुरु गर्ने निर्णय गरेको थियो। यससँगै यसअघि दर्ता भएका सबै उम्मेदवारी स्वतः खारेज भएका थिए। निर्वाचन समितिका संयोजक घिमिरेका अनुसार विवाद समाधानपछि प्रतिनिधिको संख्या पुनः व्यवस्थापन गरिएको छ।
