२६ जेठ, बुटवल । बुटवलस्थित लुम्बिनी केबलकारमा विगत तीन वर्षमा पाँच लाखभन्दा बढी पर्यटकले यात्रा गरेका छन् । रुपन्देहीको बुटवल र पाल्पाको बसन्तपुर डाँडालाई जोड्ने यो केबलकार २०८० जेठ १५ गतेबाट व्यावसायिक रुपमा सञ्चालनमा आएको हो भने औपचारिक उद्घाटन २०८० जेठ २५ गते गरिएको थियो । तीन वर्षको सञ्चालन अवधिमा ५ लाखभन्दा बढी पर्यटकहरूले केबलकारको यात्रा गरेका छन् र तीमध्ये करिब आधा भारतीय पर्यटक रहेको केबलकारले जनाएको छ ।
डेढ अर्बभन्दा बढी लगानीमा सञ्चालनमा आएको केबलकारको माथिल्लो स्टेशन बसन्तपुरमा एक हजार जनालाई क्षमताका साथ बैंक्वेट हल, साथै साढे तीन अर्ब लगानीमा पाँचतारे होटल निर्माणको प्रक्रिया अघि बढिरहेको छ भनी आम सञ्चालन प्रबन्धक डिएन कायस्थ सैंजूले बताएका छन् । विशेषगरी भारतको उत्तर प्रदेशका पर्यटकहरूलाई लक्षित गर्दै पाँचतारे होटल निर्माणको तयारी भइरहेको उनले जानकारी दिएको छ । हालको पर्यटक आगमनले सञ्चालन खर्च धान्न नसकेको र आगामी तीन वर्षभित्र पाँचतारे होटल निर्माण सम्पन्न गर्ने लक्ष्य रहेको सैंजूले बताए ।
स्थानीय व्यवसायी र आईएमई समूहको लगानीमा निर्माण भएको लुम्बिनी केबलकार बुटवलको बमघाटदेखि पाल्पाको तिनाउ गाउँपालिका–३ बसन्तपुरसम्म करिब ३ किलोमिटर लामो छ । यो नेपालको दोस्रो सबैभन्दा लामो र लुम्बिनी प्रदेशको पहिलो केबलकार हो । केबलकारको निर्माणपछि सुनसान रहेको पाल्पाको तिनाउ गाउँपालिका ३ को बसन्तपुर डाँडो प्रदेशकै आकर्षक पर्यटकीय गन्तव्य बनेको छ ।
माथिल्लो स्टेशनमा जीपलाइन, स्काई साइकलिङ, बालउद्यान, रेस्टुराँ, आधुनिक पिङ लगायत पूर्वाधारहरू बनेका छन् । बसन्तपुरबाट बुटवल, तिलोत्तमा हुँदै भैरहवासम्मको दृश्य र मौसम स्पष्ट हुँदा हिमश्रृंखला समेत देख्न पाइन्छ । लुम्बिनी केबलकारले करिब सय जनालाई रोजगारी दिएको छ, जसमा अधिकांश स्थानीय छन् । समुद्र सतहबाट करिब एक हजार मिटर उचाइमा रहेको बसन्तपुरमा तराई क्षेत्रका तुलनामा ७ देखि १० डिग्री सेल्सियससम्म कम तापक्रम हुन्छ ।
