नेपाल क्लाइम्बिङ स्पोर्ट संघले आयोजना गर्ने नेशनल स्पोर्ट क्लाइम्बिङ च्याम्पियनसिप २०२६ आगामी जेठ ३० गते काठमाडौंमा सुरु हुँदैछ। बोल्डरिङ विधामा आधारित प्रतियोगितामा सातै प्रदेशका १७ वर्षमाथिका खेलाडीहरू सहभागी हुन सक्नेछन्। प्रतियोगिता २५ लाख रुपैयाँको अनुमानित बजेटमा आयोजना हुनेछ, विजेतालाई क्रमशः ३० हजार, २० हजार र १० हजार रुपैयाँ पुरस्कार प्रदान गरिनेछ।
नेपाल क्लाइम्बिङ स्पोर्ट संघले आज पत्रकार सम्मेलनमार्फत जानकारी गराएको छ कि प्रतियोगिता जेठ ३० गते (जुन १३, २०२६) कालधारा, ठमेलस्थित काठमाडौं स्पोर्ट क्लाइम्बिङ सेन्टरमा आयोजना गरिनेछ। यो प्रतियोगिता अन्तर्राष्ट्रिय क्लाइम्बिङ महासंघले निर्धारण गरेको नियम र मापदण्ड अनुसार सञ्चालन हुनेछ। एकदिने यस प्रतियोगितामा सातै प्रदेशका १७ वर्षमाथिका खेलाडीहरूले सहभागिता जनाउन सक्नेछन्। प्रतियोगिता बिहान ८ बजेदेखि सुरु हुनेछ।
उद्घाटन राष्ट्रिय खेलकुद परिषद्का सदस्य-सचिव रामचरित्र मेहताले गर्ने कार्यक्रम रहेको छ। खेलाडीलाई सुरुमा प्रतियोगिताको संरचना र नियमबारे जानकारी गराइनेछ भने दिनभर क्वालिफिकेसन र फाइनल चरणका खेलहरू हुनेछ। क्वालिफिकेसनबाट महिला र पुरुषतर्फ ८–८ जना फाइनलिस्ट छनोट गरिनेछ। फाइनल प्रतिस्पर्धाबाट उत्कृष्ट महिला र पुरुष खेलाडीहरूलाई प्रथम, द्वितीय र तृतीय स्थानमा पुरस्कृत गरिनेछ।
संघका सचिव सुजित कँडेलका अनुसार हालसम्म २५ खेलाडीले दर्ता गराइसकेका छन् र दर्ता प्रक्रिया जुन ११ गतेसम्म खुला रहनेछ। उहाँले करिब ५० खेलाडीको सहभागिता हुने अपेक्षा गरिएको बताउनुभयो। संघका अध्यक्ष रमेश पौडेलले क्लाइम्बिङ खेलले खेल पर्यटन प्रवर्द्धनसहित देशको समग्र अर्थतन्त्रमा योगदान गर्न सक्ने सम्भावना रहेको उल्लेख गर्नुभयो। प्रतियोगिताको अनुमानित बजेट २५ लाख रुपैयाँ रहेको छ। विजेताहरूलाई नगद पुरस्कार, मेडल र प्रमाणपत्र पनि प्रदान गरिनेछ।
सम्बन्धित खबर
