पाँचौं नखिपोट खुला पुरुष बास्केटबल प्रतियोगितामा टाइम्स र इन्जिनियरिङ टोलीले क्वार्टरफाइनलमा विजयी भएर प्रवेश गरेका छन्। मंगलबार सम्पन्न खेलमा टाइम्सले एलाइटलाई ७९–५१ को फराकिलो अन्तरले हरायो भने इन्जिनियरिङले रोयल्सलाई ५४–४८ अंक अन्तरले पराजित गर्यो। महिला वर्गमा बलर्सले एनसीसीएसलाई ३३–११ ले पराजित गर्दै प्रतियोगितामा पहिलो जीत दर्ता गर्यो। २६ जेठ, काठमाडौं।
नखिपोटस्थित आयोजक नखिपोट युथ क्लबको कभर्ड हलमा सम्पन्न खेलमा टाइम्सले एलाइटलाई ७९–५१ को फराकिलो अन्तरले पराजित गर्यो। टाइम्सका कुशल शाक्यले १४ अंक थपेका थिए। पहिलो क्वार्टरमा टाइम्सले २२–११ को अग्रता लिएपछि दोस्रो क्वार्टरमा १४–१५ को थोरै अन्तरमा पछि परेको थियो। तर तेस्रो क्वार्टरमा २१–१३ र चौथो क्वार्टरमा २२–१२ को प्रभुत्व स्थापित गर्दै टाइम्सले जितको अन्तर फराकिलो बनायो।
इन्जिनियरिङले रोयल्सलाई अतिरिक्त समयमा ५४–४८ अंकले पराजित गर्यो। नियमित समयको खेल ४६–४६ को बराबरीमा सकिएको थियो। अतिरिक्त समयमा इन्जिनियरिङले ८ र रोयल्सले मात्र २ अंक जोड्न सफल भयो। इन्जिनियरिङका समिर उप्रेतीले २० अंक बटुले। महिला वर्गमा बलर्सले एनसीसीएसलाई ३३–११ ले हरायो। बलर्सकी जेसिका लामाले १३ अंक जोडेकी छन्। यो बलर्सका लागि दुई खेलपछि पहिलो जित हो। उनीहरूको समूहमा बलर्स, एनसीसीएस र ट्रेनिङ ग्राउन्ड गरी तीन टोली छन्। ट्रेनिङ ग्राउन्डले पहिलो खेलमा जीत दर्ता गरिसकेको छ भने एनसीसीएसले यो दोस्रो खेलमा हार व्यहोर्नुपरेको छ। तीनै टोलीले सेमीफाइनलको मौका कायमै राखेका छन्।
