दोस्रो राष्ट्रिय खुला एन्जल्स हार्ट अन्तरविद्यालय पुरुष भलिबल प्रतियोगिताको फाइनल वर्षाका कारण स्थगित भएको छ। हिमरश्मि र न्युटनबीचको फाइनल खेल पुनः सुरुमैबाट खेलाइने गरी स्थगित गरिएको आयोजकले जनाएको छ। प्रतियोगितामा तेस्रो स्थान हासिल गरेको कल्याण माविले १५ हजार रुपैयाँ पुरस्कार पाउनेछ। २६ जेठ, काठमाडौं।
दोस्रो राष्ट्रिय खुला एन्जल्स हार्ट अन्तरविद्यालय/कलेज स्तरीय पुरुष भलिबल प्रतियोगिताको फाइनल वर्षाका कारण स्थगित भएको छ। हिमरश्मि र न्युटनबीच चौथो सेट खेलिरहेकै बेला भारी वर्षा भएपछि खेल स्थगित गर्नुपर्ने भएको आयोजक एन्जल्स हार्ट माविका प्रिन्सिपल धनबहादुर पुनले बताएका छन्। ‘बेस्ट अफ फाइभ’ फाइनलमा शुरुवाती दुई सेट हिमरश्मिले जितेको थियो। तेस्रो सेट न्युटनले जितेको थियो। चौथो सेटमा हिमरश्मि १३–७ ले अगाडि रहेको अवस्थामा भारी वर्षा सुरु भयो। पानी भएका कारण मैदान खेल लायक नभएपछि खेल स्थगित गरिएको हो।
बुधबार न्युटन टिम यू–१९ भलिबल प्रतियोगिता खेल्न बुटवल जान लागेकोले फाइनल खेलको मिति पछि प्राविधिक समिति सँग बैठक गरी निर्धारण गरिने एन्जल्स हार्टका भाइस प्रिन्सिपल दिलबहादुर बुढाथोकीले जानकारी दिए। फाइनल पुनः सुरुकै अवस्थाबाट खेलाइने भएको छ। मनमैजुस्थित एन्जल्स स्पोर्ट्स एकेडेमी एन्ड रिक्रिएसन सेन्टरमा भएको प्रतियोगितामा कल्याण माविले तेस्रो स्थान प्राप्त गर्यो। शीर्ष तीन स्थान हासिल गर्ने टिमहरूले क्रमशः ५० हजार, ३० हजार र १५ हजार रुपैयाँ नगद पुरस्कार पाउनेछन्। उत्कृष्ट खेलाडी, स्पाइकर, लिफ्टर, सर्भर, ब्लकर र डिफेन्डरलाई पनि नगदसहित पुरस्कार दिइनेछ।
