काठमाडौंमा अर्थतन्त्र र भू-राजनीतिमा केन्द्रित अन्तरराष्ट्रिय सम्मेलन ‘बोधि संवाद’ हुँदैछ

२६ जेठ, काठमाडौं । अर्थतन्त्र र भू-राजनीतिमा केन्द्रित अर्को अन्तरराष्ट्रिय सम्मेलन ‘बोधि संवाद’ काठमाडौंमा अर्को साता आयोजना हुन लागेको छ। सेन्टर फर सोसल इनोभेसन एन्ड फरेन पोलिसी (सेसिफ) ले आउँदो मंगलबारदेखि शुक्रबारसम्म चार दिने सम्मेलन आयोजना गर्न लागेको छ। सम्मेलनमा नेपालको आर्थिक विकासको सम्भावना र दक्षिण एशियामा तीव्र रूपमा रूपान्तरण हुँदै गरेको भू-राजनीतिक परिवेशमा चीनको भूमिकाबारे नेपाली र विदेशी विज्ञहरूबीच गम्भीर छलफल गरिनेछ, सेसिफका अध्यक्ष एवं पूर्वराजदूत विजयकान्त कर्णले जानकारी दिएका छन्। विदेशबाट १६ जना विद्वान सहभागी हुनेछन्।

मंगलबार आयोजित पत्रकार सम्मेलनमा सेसिफले ‘बोधि संवाद’ लाई आर्थिक, राजनीतिक तथा भू-राजनीतिक परिवर्तनहरूबारे गम्भीर र दूरदर्शी बहस गर्ने साझा मञ्चको रूपमा प्रस्तुत गर्ने योजना रहेको जनाएको छ। विश्वव्यापी रूपमा शक्ति सन्तुलन, प्रविधि र अन्तरराष्ट्रिय सम्बन्धमा तीव्र परिवर्तन भइरहेका बेला यस्ता विषयहरूको अर्थ, प्रभाव र सम्भावित दिशामाथि गहिरो विमर्श आवश्यक रहेको आयोजकले बताएका छन्। चार दिनसम्म चल्ने सम्मेलनमा मंगलबार र बुधबार ‘नेपालको आर्थिक विकासको सम्भावना’ विषयमा केन्द्रित सत्रहरू सञ्चालन गरिनेछन् भने बिहीबार र शुक्रबार ‘दक्षिण एसियामा भू-राजनीतिक परिवर्तन र चीनको भूमिका’ विषयमा छलफल गरिनेछ।

आर्थिक विकाससम्बन्धी सत्रहरूमा सुशासन, पारदर्शिता, लगानीमैत्री वातावरण, बहुराष्ट्रिय कम्पनीहरूको लगानी चुनौती, ऊर्जा र पूर्वाधार विकास, श्रम बजार सुधार, शिक्षा र सीप विकास, डिजिटल रूपान्तरण तथा दीर्घकालीन आर्थिक समृद्धिको मार्गचित्रजस्ता विषयमा बहस गरिनेछ। यसका लागि राजनीतिक नेतृत्व, नीति निर्माता, अर्थशास्त्री, निजी क्षेत्रका प्रतिनिधि, विकास साझेदार, अनुसन्धानकर्ता र युवा नेतृत्वलाई एउटै मञ्चमा ल्याइनेछ, आयोजकले जानकारी दिएका छन्।

त्यसैगरी, दक्षिण एसियाको बदलिरहेको भू-राजनीतिक अवस्थाका सन्दर्भमा केन्द्रित दोस्रो धारामा चीनको बढ्दो आर्थिक, कूटनीतिक, प्राविधिक र रणनीतिक प्रभावको समीक्षा गरिनेछ। दक्षिण एसियाली मुलुकहरूले परिवर्तनशील अन्तरराष्ट्रिय शक्ति संरचनाबीच आफ्ना राष्ट्रिय हित र रणनीतिक स्वायत्तता कसरी सुनिश्चित गर्ने भन्ने विषयमा समेत छलफल गरिनेछ।