राष्ट्रिय पुम्से तेक्वान्दो प्रशिक्षक कविराज खड्गी विश्व तेक्वान्दो अन्तर्राष्ट्रिय पुम्से प्रशिक्षक प्रमाणपत्र प्राप्त गर्ने पहिलो नेपाली प्रशिक्षक भएका छन्। खड्गीले विश्व तेक्वान्दो महासंघको अनलाइन कोर्स पूरा गरी परीक्षा सफलतापूर्वक उत्तीर्ण गरेपछि यो प्रमाणपत्र प्राप्त गरेका हुन्। नेपाल तेक्वान्दो संघका अध्यक्ष दीपराज गुरुङले प्रशिक्षक खड्गीलाई औपचारिक रूपमा सो प्रमाणपत्र हस्तान्तरण गरेका छन्। २६ जेठ, काठमाडौं।
कविराज खड्गी राष्ट्रिय खेलकुद परिषद् र राष्ट्रिय टिम तयारीद्वारा सञ्चालित मिशन २०२६ को विशेष प्रशिक्षण कार्यक्रमका प्रशिक्षकसमेत हुन्। उनले विश्व तेक्वान्दो महासंघ (डब्लूटी) को कार्यक्रमअनुसार सन् २०२६ मे १५ देखि २१ सम्म अनलाइनमार्फत सञ्चालन भएका डब्लूटी पुम्से कोच सर्टिफिकेशन कोर्स अध्ययन गरी परीक्षा सफलतापूर्वक उत्तीर्ण गरेका छन्। अन्तर्राष्ट्रिय सर्टिफिकेशन पुम्से कोर्सले पुम्से तेक्वान्दो क्षेत्रमा प्राविधिक ज्ञान र प्रशिक्षण विशेषज्ञताको उच्च स्तरलाई प्रतिनिधित्व गर्दछ।
यो महत्वपूर्ण उपलब्धिलाई नेपाल तेक्वान्दो संघको कार्यालयमा संघका अध्यक्ष दीपराज गुरुङले औपचारिक रूपमा प्रमाणपत्र हस्तान्तरण गरे। अध्यक्ष गुरुङले प्रशिक्षक खड्गीलाई यो उपलब्धिको लागि बधाई दिँदै राष्ट्रिय पुम्से तेक्वान्दो टिमको तयारीका लागि शुभकामना व्यक्त गरे। चीनको हाङ्जाउमा सम्पन्न १९औं एशियाली खेलकुदमा पनि खड्गी पुम्से प्रशिक्षकको रूपमा सहभागी थिए। जापानको आइची नागोयामामा हुँदै गरेको २०औं एशियाली खेलकुदका लागि पुम्से टिम तयारी गरिरहेको नेपाल तेक्वान्दो संघले जानकारी दिएको छ।
