२७ जेठ, काठमाडौं। इरानले अमेरिकी ‘एमक्यू-९ रिपर’ ड्रोन खसालेको दाबी गरेको छ। इरानको तस्निम समाचार एजेन्सीका अनुसार यो हमला दक्षिणी इरानको जाम क्षेत्रमा गरिएको हो। सामाजिक सञ्जालमा ड्रोन खसालिएको भनिएको एउटा भिडियो पनि सार्वजनिक भएको छ। यद्यपि, अमेरिकी सेनाले एमक्यू-९ ड्रोन खसिएको विषयमा अहिलेसम्म कुनै आधिकारिक पुष्टि गरेको छैन। अमेरिकाले इरानविरुद्धको आफ्नो सैन्य कारबाही पुरा भएको घोषणा गरेपछि यो खबर आएको हो।
अमेरिकी केन्द्रीय कमाण्ड (सेन्टकम) का अनुसार अमेरिकी सेनाको अपाचे हेलिकप्टर खसालिएको र यस क्षेत्रमा रहेका अमेरिकी बल तथा व्यावसायिक पानीजहाजहरूमा आक्रमण भएको जवाफमा यो हमला गरिएको थियो। सेन्टकमले जनाएको छ कि अमेरिकी वायु सेना र नौसेनाका लडाकु विमानहरूले होर्मुज स्ट्रेट नजिकैका इरानी वायु रक्षा प्रणाली, ग्राउन्ड कन्ट्रोल स्टेशन् र निगरानी राडार केन्द्रहरूलाई सटीक हतियार प्रयोग गरी लक्षित गरेका थिए।
यसैबीच, इरानको इस्लामिक रिभोलुसनरी गार्ड कर्प्स (आईआरजीसी) ले आफ्ना एयरोस्पेस फोर्सले जोर्डनस्थित अमेरिकी सैन्य कर्मचारीहरू रहेको एयरबेसमा लामो दूरीका ठोस इन्धनयुक्त मिसाइलहरू प्रहार गरेको घोषणा गरेको छ। विज्ञप्तिमा आईआरजीसीले आफ्ना मिसाइलहरूले उक्त बेसमा रहेका चारवटा अत्यन्त महत्त्वपूर्ण लक्ष्यहरूलाई सटीक रूपमा नष्ट गरेको दाबी गरेको छ। नष्ट गरिएका लक्ष्यहरूमा एफ-३५ लडाकु विमान राख्ने ह्याङ्गरहरू र मुख्य कमान्ड तथा नियन्त्रण केन्द्र समावेश छन्।
आईआरजीसीले यस मिसाइल हमलालाई आफ्नो बृहत् जवाफी कारबाहीको समापनको रूपमा प्रस्तुत गरेको छ। यस बृहत् कारबाही अन्तर्गत मध्यपूर्व क्षेत्रभरिका विभिन्न अमेरिकी हवाई तथा नौसैनिक अखडाहरूका २१ वटा लक्ष्यहरूमा आक्रमण गरिएको र इरानी हवाई क्षेत्रमा अमेरिकी एमक्यू-९ ड्रोन खसालिएको समेत यसको दाबी छ। आईआरजीसीले अन्त्यमा अमेरिकालाई कडा चेतावनी दिँदै भनेको छ – यसपछिका कुनै पनि अमेरिकी सैन्य कारबाहीको ‘निर्णायक र विनाशकारी’ जवाफ दिन आफ्ना सेनाहरू पूर्ण रूपमा तयार छन् र यदि थप तनाव बढ्यो भने त्यसको सम्पूर्ण परिणामको जिम्मेवारी वासिङ्टन (अमेरिका) ले लिनुपर्नेछ। (एजेन्सीको सहयोगमा)
