२७ जेठ, काठमाडौं । नेकपा एमालेका महासचिव शंकर पोखरेलले सत्तारूढ दल राष्ट्रिय स्वतन्त्र पार्टीको कार्यशैलीप्रति तीव्र आलोचना गरेका छन्। शुक्रबार सामाजिक सञ्जाल फेसबुकमार्फत रास्वपाको नाम नलिईकन ‘जान्नेलाई छान्ने’ भन्ने नारामाथि प्रतिक्रिया दिँदै नयाँ राजनीतिक दल तथा तिनका नेताहरूको कार्यशैलीप्रति कडा टिप्पणी गरेका छन्। पोखरेलले नयाँ शक्तिहरूको कार्यशैलीलाई ‘पाखण्ड’ र ‘भ्रष्टताको संस्थागत रूप’ संबोधन गरेका छन्। उनले भनेका छन् कि सुशासन र तीव्र विकासका लागि पुराना दल र नेतृत्वमा रहेका कमीकमजोरीहरू हटाउनु जरूरी छ, तर नयाँ पार्टीहरूले ती पुराना कमीकमजोरीहरूलाई बिर्साउने गरी गरिरहेको कुकार्य कदापि स्वीकार्य छैन।
पोखरेलले आफ्नो फेसबुक पोस्टमा ‘जान्नेलाई छान्नेको भ्रष्टीकरण’ शीर्षक राख्दै रास्वपासहितका नयाँ दलहरूको नाराको वास्तविकता क्रमशः खुल्दै गएको दाबी गरेका छन्। उनले नयाँ भनिएका शक्तिहरूमा देशविरुद्धका घातहरूलाई सामान्य ठान्ने र राज्यविरुद्धका विध्वंसात्मक अपराधलाई बहादुरी ठान्ने प्रवृत्ति देखिएको आरोप पनि लगाएका छन्। ‘यदि यही कुरा ‘जान्नेलाई छान्ने’ भनिन्छ भने यो योग्यता होइन, पाखण्ड हो। स्वेच्छाचारिता, पक्षपात र भ्रष्टताको संस्थागत रूप हो,’ उनले लेखेका छन्। महासचिव पोखरेलको यो कडा प्रतिक्रिया विशेषगरी अर्थ विधेयकमा आएको भनिएको फेरबदल र हालै नयाँ दलहरूसँग सम्बन्धित विवादहरूको पृष्ठभूमिमा आएको बुझिएको छ।
पोखरेलले भनेका छन्, ‘जान्नेलाई छान्ने’ को भ्रष्टीकरण ‘जान्नेलाई छान्ने’ भन्ने नाराको वास्तविकता क्रमशः प्रकट हुँदैछ। देशविरुद्धका घातहरूलाई सामान्य मान्ने, राज्यविरुद्धका विध्वंसात्मक अपराधलाई बहादुरी ठान्ने, स्वार्थमा आधारित सेटिङलाई विधि बनाउने, अर्थविधेयक जस्ता संवेदनशील दस्तावेजमा गैरकानूनी छेडखानी गर्ने, अवैध धनका स्रोतलाई प्रणालीको कमजोरी देखाउने, आफ्ना मानिसलाई जुक्ति लगाएर छुटकारा दिने र अरूलाई दोषी देखाउन खोज्ने प्रवृत्ति देखा परिरहेको छ। यदि यही कुरा ‘जान्नेलाई छान्ने’ हो भने, यो योग्यता होइन, पाखण्ड हो। स्वेच्छाचारिता, पक्षपात र भ्रष्टताको संस्थागत रूप हो। सुशासन र तीव्र विकासका लागि विगतका कमीकमजोरी हटाउनु जरुरी छ, तर तिनलाई बिर्साउने र नयाँ नाममा गरिने कुकार्य कदापि स्वीकार्य छैन।
