गर्भावस्थाको अन्तिम चरणमा कठिन योगासन गर्ने एक भारतीय महिला सामाजिक सञ्जालमा भाइरल बनेकी छिन्। उनका गरिरहेका यी कठोर योगासनहरू गर्भावस्थामा कतिको सुरक्षित छन् भन्ने विषयमा विवाद चलिरहेको छ। बैंग्लोरकी उक्त महिलाको गर्भ ४० सातासम्म पुगेको छ। उनले मात्र दुई दिनअघि पनि योगासन गर्दै गरेको भिडियो सामाजिक सञ्जालमा पोस्ट गरेकी थिइन्। गर्भावस्थामा योग गर्दै गरेको फोटो र भिडियोहरू उनी नियमित रूपमा साझा गर्दै आएकी छन्।
उनको चर्चा अघिल्लो सातादेखि सुरु भएको थियो, जब उनले साडी लगाएर योग गर्दै गरेको तस्बिर र भिडियो सामाजिक सञ्जालमा शेयर गरेकी थिइन्। ती सामग्रीहरूमा उनले कठिन योगासनहरू पनि प्रदर्शन गरेको देखिन्छ। ३९औं हप्तामा प्रवेश गरेको बेला उनले आफ्ना अनुभवहरू समेत व्यक्त गरेकी थिइन्। यसपछि “गर्भावस्थाको यस्तो अवस्थामा कठोर योगासन गरेर जोखिम उठाउनु उचित हो कि होइन?” भन्ने विषयमा बहस सुरु भएको छ। शशी प्रभा द्विवेदी नाम गरेकी महिला पेशाले योग शिक्षक र व्यवसायी हुन्।
उनका फोटो र भिडियोहरूमा लाखौं भ्यूज र हजारौं प्रतिक्रियाहरू आएका छन्। धेरैले गर्भावस्थाको यस अवस्थामा उन्नत योगासनहरू जोखिमपूर्ण हुनसक्ने भन्दै बच्चाको सुरक्षाका लागि सावधानी अपनाउन सुझाव दिएका छन्। कतिपयले उनलाई साहसी महिलाका रूपमा प्रशंसा गरेका छन्। गर्भावस्थामा शारीरिक व्यायाम आवश्यक भए तापनि, विशेषज्ञहरूको मतमा यस प्रकारका कठिन योगासन सबै महिलाका लागि सुरक्षित हुँदैनन्।
गर्भावस्थाको अन्तिम चरणमा शरीरको सन्तुलनमा परिवर्तन हुन्छ। अत्यधिक झुक्नु, सन्तुलन मिलाउनुपर्ने वा पेटमा बढी दबाव पर्ने योगासनहरूले जोखिम बढाउन सक्छ भन्ने विज्ञहरूको सुझाव छ। त्यसैले, विशेषज्ञहरूले महिलालाई हल्का व्यायाम गर्ने र स्वास्थ्य अवस्थालाई ध्यानमा राखेर मात्र योग शिक्षक तथा चिकित्सकको सल्लाह अनुसार अभ्यास गर्न सल्लाह दिन्छन्। सामाजिक सञ्जालमा अन्धरूपमा पछ्याउनु जोखिमपूर्ण भएको विज्ञहरूले बताएका छन्। गर्भावस्थामा नयाँ फिटनेस विधि वा दिनचर्या अपनाउनका लागि विशेषज्ञसँग परामर्श लिन अनिवार्य रहेको सुझाव दिइएको छ।
