२७ जेठ, काठमाडौं । फुटबलको महाकुम्भ फेरि आउँदैछ । जुन ११ देखि मेक्सिकोको एस्टाडियो आज्टेकामा सुरु हुने २०२६ फिफा विश्वकपले विश्वका अर्बौं दर्शकहरूलाई एकै ठाउँमा भेला पार्नेछ । यसपटकको विश्वकप इतिहासमा पहिलो पटक तीन राष्ट्र—संयुक्त राज्य अमेरिका, क्यानडा र मेक्सिको—ले संयुक्त रूपमा आयोजना गर्दैछन् । यस फुटबल महाकुम्भको केन्द्रमा छिन् परिचित अनुहार, कोलोम्बियाकी गायिका शकिरा । उनले १६ वर्षअघि ‘वाका वाका (दिस टाइम फर अफ्रिका)’ गीतमार्फत विश्वभर परिचय बनाएकी थिइन् । अब २०२६ मा उनी फेरि विश्वमञ्चमा उभिएकी छिन् र नाइजेरियन सुपरस्टार बर्ना बोयसँग मिलेर नयाँ गीत ‘दाइ-दाइ’ गाउँदै छिन् ।
सन् २०१० को विश्वकप दक्षिण अफ्रिकामा आयोजना हुन लागेको थियो। फिफाले यस्तो गीत चाहन्थ्यो जसले विश्वका सबै कुनाकुनाका दर्शकलाई एउटै धागोमा जोड्न सकोस् । त्यसबेला शकिरा दक्षिण अफ्रिकाबाट समुद्रपारि उरुग्वेमा रहेको आफ्नो फार्ममा बिदा बिताइरहेकी थिइन् । फार्मबाट घरतर्फ फर्किँदै गर्दा उनलाई एउटा नयाँ धुनको कल्पना आयो र उनले अङ्ग्रेजीमा शब्द सहित त्यो धुन गुनगुनाउन थालिन् । तत्पश्चात उनले सोनी म्युजिकलाई फोन गरी उत्साहित हुँदै भनिन्, ‘मैले अहिलेसम्मकै सबैभन्दा अद्भुत विश्वकप गीत लेखिसकें ।’
‘वाका वाका’को सफलतामाथि एउटा विवाद पनि थियो। दक्षिण अफ्रिका विश्वकपको आयोजना गरिरहेको बेला अफ्रिकी कलाकारहरूको सट्टा कोलोम्बियाकी एक गायिका आधिकारिक गीतका लागि रोजिएपछि धेरै दक्षिण अफ्रिकीहरूले असन्तुष्टि देखाए। तर रमाइलो कुरा यो हो कि फ्रेसलीग्राउन्डले आफूमाथि अपमान भएको महसुस गरेन। बर्ना बोयलाई सहकलाकारको रूपमा समावेश गर्नु एउटा सचेत र रणनीतिक निर्णय भएको देखिन्छ। फिफाले पहिलोपटक विश्वकपको फाइनलमा हाफटाइम शो आयोजना गर्दैछ र यसका लागि विश्वकै तीन ठूला पप कलाकारहरूलाई चयन गरेको छ।
