२७ जेठ, काठमाडौं । नेपाली कांग्रेसले बुधबार साँझसम्म चार लाख ५७ हजार ३६६ जनाले क्रियाशील सदस्यता अद्यावधिक गरी एनसीआईडी प्राप्त गरेको जनाएको छ। कांग्रेस महामन्त्री तथा सदस्यता व्यवस्थापन समितिका संयोजक प्रदीप पौडेलले बुधबार साँझ प्रेस विज्ञप्ति जारी गर्दै यस्तो जानकारी दिएका छन्। ‘नेपाली कांग्रेसको क्रियाशील सदस्यता अद्यावधिक गर्न योग्य कुल ७ लाख ८२ हजार २०९ जना सदस्यमध्ये आजको मितिसम्म ४ लाख ५७ हजार ३ सय ६६ जनाले एनसीआईडी प्राप्त गरिसक्नुभएको छ,’ विज्ञप्तिमा भनिएको छ, ‘एक लाख २४ हजार ७४८ जनाले स्वयं अद्यावधिक फारम बुझाएर अद्यावधिक प्रक्रियामा रहेका छन्।’ छुटेकालाई तोकिएको सीमाभित्र क्रियाशील सदस्यता अद्यावधिक गर्न महामन्त्री पौडेलले अपिल गरेका छन्। उनले विज्ञप्तिमा सदस्यता अद्यावधिक गर्न एक दिन मात्रै बाँकी रहेको र ती प्रक्रिया बिहीबार राति १२ बजे सम्म मात्रै रहने पनि उल्लेख गरेका छन्।
