चितवन राइनोजले नेपाल प्रिमियर लिगको आगामी सिजनका लागि मार्की खेलाडी कुशल मल्लसहित सात खेलाडीलाई कायम राखेको छ। रिटेन गरिएका अन्य खेलाडीहरूमा देव खनाल, कमल सिंह ऐरी, अर्जुन साउद, रिजन ढकाल, रञ्जित कुमार र दीपक बोहोरा रहेका छन्। चितवन राइनोजले खेलाडी ड्राफ्ट र अन्य प्रक्रियामार्फत थप सन्तुलित तथा प्रतिस्पर्धात्मक टोली निर्माण गर्ने प्रतिबद्धता जनाएको छ।
भरतपुर, चितवन। चितवन राइनोजले नेपाल प्रिमियर लिग (एनपीएल) को तेस्रो सिजनका लागि मार्की खेलाडी कुशल मल्लसहित सात खेलाडी कायम राखेको छ। चितवन राइनोजले शुक्रबार प्रेस विज्ञप्ति जारी गर्दै सात खेलाडी कायम राखेको घोषणा गरेको हो। फ्रेन्चाइजले निरन्तरता, स्थायित्व तथा दीर्घकालीन सफलतालाई केन्द्रमा राख्दै टोलीको बलियो आधार कायम राख्ने उद्देश्यका साथ खेलाडीहरूलाई कायम राखेको चितवनले जनाएको छ।
कायम राखिएका खेलाडीहरूमध्ये मार्की तथा कप्तान कुशल मल्ल, देव खनाल, कमल सिंह ऐरी, अर्जुन साउद, रिजन ढकाल, रञ्जित कुमार र दीपक बोहोरा छन्। यी खेलाडीहरूले गत सिजनमा टोलीको प्रदर्शन र विकासमा महत्वपूर्ण योगदान पुर्याएको र राष्ट्रिय टोलीको अनुभव, घरेलु क्रिकेटमा स्थापित प्रदर्शन तथा युवा प्रतिभाको उत्कृष्ट संयोजन रहेको चितवन राइनोजले जनाएको छ। यस समूहलाई आगामी सिजनको टोली निर्माणको मुख्य आधारका रूपमा हेरिएको छ।
कुशल मल्लको नेतृत्व क्षमता, अन्तर्राष्ट्रिय अनुभव तथा खेल जिताउने क्षमताले टोलीलाई थप मजबूत बनाउने अपेक्षा गरिएको छ। देव खनाल र अर्जुन साउद नेपाली क्रिकेटका सम्भावनाशील युवा खेलाडीका रूपमा स्थापित भइरहेका छन् भने कमल सिंह ऐरीको अलराउण्ड क्षमता टोलीका लागि महत्वपूर्ण रहनेछ। त्यसैगरी रिजन ढकाल, रञ्जित कुमार र दीपक बोहोराले आफ्नो निरन्तर प्रदर्शन, मेहनत र समर्पणमार्फत टोली व्यवस्थापनको विश्वास जितेका छन्, राइनोजले जनाएको छ। चितवन राइनोज व्यवस्थापनले बलियो कोर समूहलाई निरन्तरता दिनु आगामी सिजनको सफलताका लागि महत्वपूर्ण कदम भएको बताएको छ। साथै खेलाडी ड्राफ्ट तथा अन्य भर्ती प्रक्रियामार्फत थप सन्तुलित र प्रतिस्पर्धात्मक टोली निर्माण गरिने जानकारी दिएको छ।
