३१ जेठ, काठमाडौं । परराष्ट्रमन्त्री शिशिर खनाल चार दिने चीन भ्रमणको क्रममा आज बेइजिङ पुगेका छन् । उनको स्वागत नेपालका कार्यवाहक चीन राजदूत रोशन खनाल र चिनियाँ विदेश मन्त्रालयका कर्मचारीहरूले गरेका छन् । मन्त्री खनाल चिनियाँ विदेशमन्त्री वाङ यीको औपचारिक निमन्त्रणामा चीन भ्रमणमा रहेका हुन् । उनी आजदेखि विभिन्न भेटघाट र अन्तरक्रियामा भाग लिने कार्यक्रम रहेको छ । भ्रमणको पहिलो कार्यक्रम नेपाली समुदायसँगको अन्तरक्रिया हुनेछ।
भ्रमणका क्रममा मन्त्री खनालले बेइजिङमा चिनियाँ समकक्षी वाङ यी र चीन सरकारका उच्चस्तरीय पदाधिकारीहरूसँग भेटवार्ता गर्ने योजना बनाएका छन्। ती भेटवार्तामा नेपाल–चीन सम्बन्धलाई थप मजबुत बनाउने साथै विभिन्न क्षेत्रहरूमा सहकार्य गहिरो बनाउन छलफल हुनेछ। भ्रमण अवधिमा बेइजिङस्थित नेपाली राजदूतावासद्वारा आयोजना गरिएको लगानी सम्मेलनमा मन्त्री खनालले भाग लिनेछन्। सो सम्मेलनले नेपालमा वैदेशिक लगानी प्रवद्र्धन गर्ने लक्ष्य राखेको छ। सम्मेलनमा उनले चिनियाँ व्यवसायी समुदायसँग संवाद गरी नेपालमा लगानीका सम्भावना र अवसरहरूबारे जानकारी दिनेछन्।
