नेता बलबहादुर केसीले पार्टीभित्र निष्ठावान कार्यकर्ताको संरक्षण नहुँदा असन्तुष्टि व्यक्त गरे

नेपाली कांग्रेसका नेता बलबहादुर केसीले पार्टीभित्र निष्ठावान् कार्यकर्ताको संरक्षण हुन नसकेको भन्दै नेतृत्वप्रति असन्तुष्टि व्यक्त गरेका छन्। उनले आफ्नो ५५ वर्ष लामो राजनीतिक संघर्ष सम्झँदै कांग्रेसले आफ्नो इतिहास भुल्न नहुने बताए। राष्ट्रिय राजनीति संकटमा रहेको बताएका नेता केसीले चुनौती सामना गर्न कांग्रेस एकढिक्का हुनुपर्नेमा जोड दिएका छन्। ३१ जेठ, विराटनगर।

विराटनगरमा कांग्रेसको विभिन्न पक्षले आयोजना गरेका कार्यक्रममा बोल्दै नेता केसीले आफ्नो ५५ वर्ष लामो राजनीतिक जीवनको संघर्ष र पार्टीको वर्तमान अवस्थाबारे समेत गम्भीर समीक्षा गरे। उनले बीपी कोइरालाका सिद्धान्त र आदर्शलाई शिरोपर गर्दै साढे पाँच दशकदेखि निःस्वार्थ रूपमा काम गरेको बताए। आफूले भोगेका कठिनाइहरू स्मरण गर्दै केसीले भने, ‘२०३६ सालको विद्यार्थी आन्दोलनमा मलाई कालो मोसो दलेर, बोरा ओढाएर र जुत्ताको माला लगाएर ठेलागाडामा राखेर घुमाइयो। ७ वर्ष जेल जीवन बिताएँ, तर म कांग्रेसको सिद्धान्तबाट विचलित भएँ भने छैन।’

नेता केसीले पार्टीको इतिहास र आन्दोलनमा ठूलो बलिदान दिएका कार्यकर्ताहरूलाई अहिले पर्याप्त संरक्षण र सम्मान नदिइएकोमा चिन्ता व्यक्त गरे। राष्ट्रिय राजनीति अहिले ठूलो संकटमा फसेको उल्लेख गर्दै उनले कांग्रेस एकढिक्का भएर अघि बढे मात्र चुनौतीहरू सामना गर्न सफल हुने बताए। उनले थपे, ‘राणा हटायो, पञ्चायत हटायो, राजालाई समेत हटाएर लोकतन्त्र ल्याउने नेतृत्व गरेको कांग्रेसले आफ्नो इतिहास भुल्यो भने त्यो ठूलो भूल हुनेछ।’ पार्टीभित्र इमानदारीको कमी देखिएकाले अब भाषणमै होइन व्यवहारमै पनि इमानदार भएर काम गर्नुपर्छ र कार्यकर्ताको भावना बुझ्नुपर्नेमा जोड दिए। कांग्रेस एकताको लागि दुवै पक्ष मिलेर अघि बढ्नु पर्ने बताए।