बाजुरा र हुम्लाबीचको विवाद सुल्झाउन बाजुराको हिमाली गाउँपालिका ३ लाम्पाटामा नेपाल प्रहरी र सशस्त्र प्रहरीको संयुक्त अस्थायी सुरक्षा केन्द्र स्थापना गरिएको छ। गत जेठ ५ गते रानीसैन क्षेत्रमा पर्यटन प्रवर्द्धनका लागि गएको धनगढीका नगरप्रमुख गोपाल हमालसहितको टोलीमाथि हुम्लाका बासिन्दाले कुटपिट र दुर्व्यवहार गरेको थियो। लाम्पाटामा स्थानीयलाई कुटपिट गरी बन्धक बनाएको घटनामा संलग्न बाबजुद हुम्लाका २३ जनाका नाममा पक्राउ पूर्जी जारी गरिएको छ।
बाजुराको हिमाली गाउँपालिका ३ लाम्पाटामा सशस्त्र प्रहरी बल र नेपाल प्रहरीको संयुक्त अस्थायी सुरक्षा केन्द्र स्थापना गरिएको छ। बाजुरा र हुम्ला बीच उत्पन्न विवादले अशान्त बनेको हिमाली गाउँपालिका–३ लाम्पाटामा संयुक्त अस्थायी सुरक्षा केन्द्र स्थापना गरिएको हो। लाम्पाटा क्षेत्र बाजुरा सदरमुकाम मार्तडीबाट कम्तीमा तीन दिनको दूरीमा अवस्थित छ। यसअघि जेठ २७ गते सदरमुकाम मार्तडीबाट हिँडेको सुरक्षा टोली तीन दिनपछि शनिबार त्यहाँ पुगेको थियो।
लाम्पाटामा सुदूरपश्चिम प्रदेश सरकारले अस्थायी प्रहरी चौकी स्थापना गर्न सुरु गरेपछि विवाद सुरु भएको थियो। पछिल्ला दिनहरूमा विवाद तीव्र हुँदा सरकारले सुरक्षाका लागि संयुक्त अस्थायी सुरक्षा केन्द्र स्थापना गरेको हो। केही दिनअघि हुम्लाका बासिन्दाहरुले बाजुराका भोटे समुदायमाथि कुटपिट र दुर्व्यवहारसहित गोठमा आगजनी गरेको घटनासमेत बाहिरिएको थियो।
त्यसपछि केन्द्रीय सुरक्षा समितिको बैठकले विवादित क्षेत्रमा नेपाल प्रहरी र सशस्त्र प्रहरी बलको संयुक्त केन्द्रीय सुरक्षा केन्द्र स्थापना गर्ने निर्णय गरेको थियो। उक्त निर्णय अनुसार दुवै सुरक्षा निकायले संयुक्त उपस्थितिमा विवादित क्षेत्रमा शान्ति, सुरक्षा र समन्वय कायम गर्दै परिस्थितिलाई नियन्त्रणमा राख्ने तयारी गरेको छ। लाम्पाटामा स्थापना गरिएको संयुक्त अस्थायी सुरक्षा केन्द्रमा सशस्त्र प्रहरी बलका प्रहरी निरीक्षक जनक पौडेलको कमाण्डमा २१ जनादेखि नेपाल प्रहरीका प्रहरी सहायक निरीक्षक मिठ्ठु बहादुर बोहराको कमाण्डमा ७ जना गरी जम्मा २८ जनाको टोली बसेको प्रमुख जिल्ला अधिकारी डोरेन्द्र निरौलाले जानकारी दिएका छन्।
