नेपाली कांग्रेसका नेता कृष्णप्रसाद सिटौलाले पार्टी भित्रको आन्तरिक कलह र महाधिवेशनको अनिश्चयता छिटो समाधान गर्न नेतृत्वलाई आग्रह गरेका छन्। उनले पार्टीभित्र आफ्नै साथीसङ्ग भएको व्यवहारलाई निन्दाजनक र अमानवीय भनेका छन्। देशको लोकतन्त्र र संवैधानिक व्यवस्था संकटमा परेको बेला कांग्रेसलाई बलियो बनाउन जोड दिएका छन्। ३१ जेठ, विराटनगर।
सिटौलाले पार्टीको विवाद समाधान गर्न नेतृत्वले साहस देखाउनुपर्ने भन्दै अनावश्यक ‘नाटक’ बन्द गर्न पनि आग्रह गरे। विराटनगरमा कांग्रेसका अर्काे समूहले आयोजना गरेको कार्यक्रममा बोल्दै उनले पार्टीको विशेष महाधिवेशन वा नियमित प्रक्रियामा भइरहेको ढिलासुस्तीप्रति असन्तुष्टि व्यक्त गरे। ‘विवाद के होला भनेर नडराउनुस्, १० मिनेटमै कुरा टुङ्गिन्छ। यो साहस तपाईँको हृदयबाट आउनुपर्छ,’ उनले सभापति थापालाई लक्षित गर्दै भने।
सिटौलाले विगतका ९औँ देखि १४औँ महाधिवेशनसम्मका उदाहरणहरुलाई सम्झाउँदै त्यसकै आधारमा आगामी महाधिवेशन सम्पन्न गर्न आग्रह गरे। पार्टी नेतृत्व र पदाधिकारीलाई प्रश्न गर्दै थपे, ‘जे निर्णय गर्ने हो, समयमै र एकमुष्ट गर्नुस्।’ ‘हामी लोकतन्त्रवादी हौँ र हामीमा मानवता हुनुपर्छ,’ सिटौलाले भने, ‘शत्रु पक्षलाई त त्यस्तो व्यवहार गरिँदैन भने आफ्नै साथीसँग भएको व्यवहार निन्दनीय छ। जस्तोसुकै अपराधीलाई पनि ‘ड्यु प्रोसेस अफ ल’ (कानुनी प्रक्रिया) अपनाइनु पर्छ भन्ने मान्यतामा हामी विश्वास गर्छौँ, तर हिजो पार्टी भित्रै देखिएको कुरा अनौठो र अमानवीय थियो।’
देशको लोकतन्त्र र संवैधानिक प्रणाली संकटमा परेको बेला कांग्रेसले आन्तरिक विवाद छिटो मिलाएर बलियो बन्नुपर्ने उनले बताए। नेता सिटौलाले पार्टी कार्यालयमा रहेका नेतृत्व तहलाई व्यक्तिगत स्वार्थभन्दा माथि उठेर एकताको निर्णय लिन र महाधिवेशन प्रक्रियालाई पारदर्शी तरिकाले अघि बढाउन आग्रह गरे। उनले कांग्रेस भित्रको विवाद समाधान गर्न संस्थापन पक्ष जिम्मेवार भएर अघि बढ्नु जिल्लाहरू संकट समाधानको प्रमुख बाटो रहेको बताए।
