नेकपा एमालेका नेता कृष्णगोपाल श्रेष्ठले केही वर्षअघि आफ्नो पार्टीका अध्यक्ष केपी शर्मा ओलीको बचाउमा प्रयोग गरेका शब्दहरू अहिले पनि धेरैको स्मृतिमा छन्। “यो दुनियाँमा कोही माइकालाल जन्मिएको छैन,” तत्कालीन प्रधानमन्त्री ओलीले राजीनामा नदिने बताउँदा तत्कालीन मन्त्री श्रेष्ठले भनेका थिए, “केपी ओली इज द केपी ओली, फुटबलको पेले जस्तै हो, के राजीनामा दे भनेर खुरुक्क राजीनामा दिन्छ?” त्यही नेता श्रेष्ठ अहिले ओलीलाई विस्थापित गर्न लागिपरेका छन्। “यो अवस्था हुनुको मुख्य जिम्मेवार उहाँ (ओली) नै हो, तर उहाँ सुध्रिने देखिएन,” उनले बीबीसीसँग भने, “अब उहाँको विस्थापनको विकल्प छैन, नत्र पार्टी नै रहँदैन।”
एमालेमा नेतृत्व परिवर्तनको माग चर्किएपछि गरिएको बैठकले निर्वाचन समीक्षा तथा पुनर्गठन कार्यदल गठन गरेको छ। यसले बागमती प्रदेशबाट सुझाव सङ्कलन गर्न सुरु गरेको छ। “अब संस्थागत रूपमा नेतृत्व परिवर्तनको प्रक्रिया अगाडि बढेको छ” भनेका नेता कर्णबहादुर थापाका लागि ओलीप्रतिको आलोचना पनि बढेको छ। यसबारे ओली पनि जानकार रहेको उनी ठान्छन्: “हामी त महाधिवेशनमा उहाँलाई हराउन लागेका थियौँ, उहाँलाई बनाउन लागेकाहरू पनि अहिले त उहाँलाई हटाउन लागेका छन्।”
पौडेलले बीबीसीसँगको कुराकानीमा त्यसबारे पछि बोल्ने बताउनुभएको थियो। तर अन्य उपाध्यक्षहरू पृथ्वी सुब्बा गुरुङ र रघुजी पन्तले सार्वजनिक रूपमा ओलीको नेतृत्वमा अघि बढ्न नसकिने अभिव्यक्ति दिइसकेका छन्। कार्यदलले बागमती प्रदेशस्तरीय छलफल अघि र पछि अध्यक्ष ओलीले देखाएको सक्रियतालाई कतिपयले प्रतिरक्षाको अन्तिम प्रयासको रूपमा लिएको पाइन्छ।
एमाले उपमहासचिव योगेश भट्टराईले फेसबुकमा लेखेका छन्, “नेकपा एमालेलाई थप एकताबद्ध बनाऔँ! पार्टी पुनर्गठनको कार्यभारलाई सफल बनाऔँ!!” नेता कृष्णगोपाल श्रेष्ठ कार्यदलले नेतृत्व परिवर्तनको बाटो खोल्ने विश्वासमा छन्। “अहिले एमाले त केपी ओलीको निजी कम्पनीजस्तो छ, तर अब त देश, पार्टी र जनताको हितका लागि नेता र कार्यकर्ताले बोल्नु पर्छ,” उनले भने।
सम्बन्धित खबर
