विश्वकप खेल्ने तीन देशका चराका मस्कट। आगामी फुटबल विश्वकप ४८ राष्ट्र र १०४ खेलसहित ठूलो ढाँचामा आयोजना हुँदैछ। विश्वकप खेल्ने ४८ राष्ट्रमध्ये फ्रान्स मात्र एउटा यस्तो देश हो, जसको राष्ट्रिय चरा घरपालुवा कुखुरा (ग्यालिक रुस्टर) रहेको छ। अस्ट्रेलियाको ‘इमु’ र न्युजिल्यान्डको ‘किवी’ उड्न नसक्ने राष्ट्रिय चरा हुन् भने पाराग्वेको घण्टी चरा संसारकै सबैभन्दा ठूलो आवाज निकाल्ने चरा हो। हरेक चार वर्ष जुन, जुलाईतिर सारा संसार फुटबलको माहोलमा हुन्छ। संसारकै सबैभन्दा धेरै हेरिने खेलकुदको महा-सङ्ग्राम फेरि फर्किएको छ। यसपटक भने झनै ठूलो ढाँचामा! ४८ राष्ट्र र १०४ खेलसहित।
विश्वकपको माहोल नै फरक मानौँ केही प्रकारको चाडपर्व नै झैं लाग्ने। सबैको आफ्नो-आफ्नो टिम र आफ्नो टिमले जितोस् भन्ने इच्छा। म भने धेरै वर्षदेखि इङ्गल्यान्डको समर्थक, सधैं जितोस् भन्दै आइरहेको छु, जित्ने छाँटकाँट छैन। विश्वकपको पर्खाइमा टोली र खेलहरूको तालिका हेर्दा दिमागमा एउटा अनौठो किसिमको जिज्ञासा जाग्यो। यति धेरै देश छन्, ती देशका राष्ट्रिय चराहरू के हुन् होला? आफ्नो जिन्दगी नै चरा वरपर घुम्ने भएकाले होला, जतिसुकै अवस्थामा पनि दिमागले चरा नै सोच्दछ। त्यो सोच बोकेर खोज्दा धेरै रोचक तथ्यहरू थाहा भयो। धेरै देशका राष्ट्रिय चराहरू रोचक र कहिलेकाहीं नासोर अवस्थामा रहेका पनि पाइन्छन्।
आज विश्वकपको एउटा अनौठो पक्ष नियालौं। सुरु गरौँ सबैभन्दा अनौठो र शायद विश्वकप हेर्ने सबैलाई परिचित राष्ट्रिय चराबाट! फ्रान्सको कुखुरा- ग्यालिक रुस्टर! यस कुखुराले फ्रान्सेली राष्ट्रिय गौरव र बहादुरीलाई मूर्तरूप दिने मानिन्छ। कुखुराहरूको वैज्ञानिक नाम हो ग्यालस डोमेस्टिकस, जहाँ ग्यालसले कुखुरा जनाउँछ र फ्रान्सको गउल क्षेत्रका बासिन्दालाई पनि जनाउँछ। रोमनहरूले गउलमा बस्नेहरूलाई त्यही नामले टाँस्ने गरेका थिए र पछि उनीहरू स्वयं त्यो नाम स्वीकार गरेका हुन्। अहिले विश्वकप खेल्ने ४८ राष्ट्रमध्ये फ्रान्स मात्र एउटा देश हो जहाँ डोमेस्टिकेटेड राष्ट्रिय चरा छ।
