शिक्षामन्त्री सस्मित पोखरेल र स्वीट्जरल्याण्डका राजदूत ड्यानिएल मेउलीबीच शिष्टाचार भेटवार्ता

शिक्षा तथा खेलकुद मन्त्री सस्मित पोखरेल र नेपालका लागि स्वीट्जरल्याण्डका राजदूत ड्यानिएल मेउलीबीच सोमबार सिंहदरबारमा शिष्टाचार भेटवार्ता सम्पन्न भएको छ। मन्त्री पोखरेलले प्राविधिक शिक्षा तथा व्यावसायिक तालिम परिषद् सम्बन्धी ऐनको मस्यौदालाई चाँडै संसदमा पेश गर्ने तयारी भइरहेको जानकारी गराउनुभयो। राजदूत मेउलीले नेपालको शिक्षा क्षेत्रमा स्वीस सहयोग निरन्तर रहने प्रतिबद्धता व्यक्त गर्दै हाल सञ्चालनमा रहेका तीन परियोजनालाई एकीकृत गरी अगाडि बढाउने योजना रहेको बताउनुभयो।

भेटवार्तामा, पोखरेल र मेउलीबीच द्विपक्षीय हित, पारस्परिक सम्बन्ध, विकास सहायता परिचालन तथा स्वीस सरकारले नेपालको शिक्षा क्षेत्रमा प्रदान गर्दै आएको सहयोगका विषयमा विस्तृत छलफल भएको थियो। स्वीट्जरल्याण्ड लामो समयदेखि नेपालमा प्राविधिक र व्यावसायिक शिक्षामा सक्रिय विकास साझेदारको रूपमा सक्रिय छ।

मन्त्री पोखरेलले नेपाल र स्वीट्जरल्याण्डबीच सदैव सुखद् र सकारात्मक सम्बन्ध रहेको उल्लेख गर्दै स्वीस सरकारको सहयोगप्रति धन्यवाद व्यक्त गर्नुभयो। उनले सिटीइभिटी सम्बन्धी ऐनको मस्यौदाको प्रक्रिया अन्तर्गत विज्ञ समूहबाट राय परामर्श लिइरहेको र प्राविधिक शिक्षालाई वर्तमान आवश्यकता अनुसार अघि बढाउन लागिपरेको जानकारी प्राप्त गराए।

राजदूत मेउलीले नेपालको शिक्षा क्षेत्रमा स्वीट्जरल्याण्डको सहयोग आगामी दिनमा पनि निरन्तरता पाउने प्रतिबद्धता दोहोर्याउँदै हाल सञ्चालनमा रहेका तीनवटा परियोजनालाई एकीकृत गरि थप प्रभावकारी बनाउने योजना रहेको जानकारी गराउनु भयो।