२ असार, धनगढी। सुदूरपश्चिम प्रदेश सरकारले आगामी आर्थिक वर्षका लागि बजेट सार्वजनिक गरेको छ। अर्थमन्त्री विक्रमसिंह धामीले उक्त बजेट सार्वजनिक गर्दै कृषि क्षेत्रमा विशेष प्राथमिकता दिइएको जानकारी दिए। उनले क्षेत्रगत कार्यक्रम अन्तर्गत कृषि, मत्स्य पालन र सहकारी क्षेत्रमा ५५ करोड रुपैयाँ विनियोजन गरिएको बताए।
धामीले पूर्ण खोप अभियानका लागि ३ करोड रुपैयाँ, सुदूरपश्चिम प्रादेशिक रोडम्याप तयार गर्न, जवलायुमैत्री नमुना गाउँ, फलफूल तथा कृषिको व्यवसायीकरण, कृषकलाई पुरस्कार वितरण, भीमदत्त ढकारी गाउँपालिका, सिगार, कमल बजार र शिखर नगरपालिकामा मुख्यमन्त्री लघु उद्यम कार्यक्रम सञ्चालन गर्न आवश्यक बजेट व्यवस्था गरिएको जानकारी दिए।
सहकारी क्षेत्र र मुक्त कमैया हलिया आय आर्जनमा सहयोग पुर्याउन ४ करोड रुपैयाँ विनियोजन गरिएको छ। एकीकृत कृषि तथा सिंचाइ विकास परियोजनाका लागि १ करोड ३५ लाख रुपैयाँ छुट्याइएको पनि उनले बताए। धनगढी विमानस्थलमा कोशेली घर स्थापना गर्न आवश्यक बजेट समेत छुट्याइएको छ।
धुलो दुग्ध कपडा कारखाना स्थापना गर्नका लागि ५ करोड रुपैयाँ विनियोजन गरिएको छ। गलैँचा उद्योग प्रवद्र्धनका लागि ६ करोड रुपैयाँ विनियोजन गरिएको छ। कृषि अनुदानलाई वैकिङ प्रणालीसँग एकीकृत गर्ने र हलगोरे पाल्ने किसानहरूलाई अनुदान दिने कामका लागि १ करोड ८० लाख रुपैयाँ बजेट छुट्याइएको पनि उनले जानकारी दिए।
